ប្រធានាធិបតីសហរដ្ឋអាមេរិកលោក Donald Trump កាលពីថ្ងៃសុក្រ បានបញ្ឈប់កិច្ចពិភាក្សាពាណិជ្ជកម្មភ្លាមៗជាមួយប្រទេសកាណាដា ជុំវិញពន្ធថ្មីរបស់កាណាដាដែលដាក់គោលដៅលើក្រុមហ៊ុនបច្ចេកវិទ្យាអាមេរិក ដោយហៅវាថាជា «ការវាយប្រហារយ៉ាងខ្លាំងក្លា» និងបាននិយាយថាលោកនឹងកំណត់អត្រាដំឡើងពន្ធថ្មីលើទំនិញរបស់កាណាដា ក្នុងសប្តាហ៍ក្រោយ។ ចំណាត់ការ បានធ្វើឱ្យធ្លាក់ចុះនូវទំនាក់ទំនងអាមេរិកជាមួយដៃគូពាណិជ្ជកម្មធំបំផុតទីពីររបស់ខ្លួនត្រឡប់ទៅរកភាពច្របូកច្របល់ឡើងវិញ បន្ទាប់ពីអំឡុងពេលនៃភាពស្ងប់ស្ងាត់ ដែលបានកើតឡើងត្រឹមតែប៉ុន្មានម៉ោងបន្ទាប់ពីលោក Scott Bessent រដ្ឋមន្ត្រីរតនាគាររបស់ លោក Trump បានបង្ហាញជំហរវិជ្ជមានលើបញ្ហាពាណិជ្ជកម្ម។

វាក៏បានកើតឡើងប៉ុន្មានម៉ោងបន្ទាប់ពីលោក Scott Bessent បានបង្ហាញជំហរវិជ្ជមានលើបញ្ហាពាណិជ្ជកម្មដោយបង្ហាញពីវឌ្ឍនភាពធ្វើឡើងជាមួយប្រទេសចិនលើការពិនិ្យឡើងវិញលំហូរនៃសារធាតុរ៉ែសំខាន់ៗសម្រាប់វិស័យផលិតកម្មរបស់សហរដ្ឋអាមេរិក និងនៅក្នុងការចរចាដំឡើងពន្ធសំខាន់ៗផ្សេងទៀត។

ចំណាត់ការរបស់លោក Trump ធ្វើឡើងមុនផែនការរបស់ប្រទេសកាណាដាដើម្បីចាប់ផ្តើមប្រមូលពន្ធលើសេវាកម្មឌីជីថលជាយូរអង្វែងលើក្រុមហ៊ុនបច្ចេកវិទ្យារបស់សហរដ្ឋអាមេរិករួមមាន ក្រុមហ៊ុនAmazon, Meta, Alphabet's Google និងក្រុមហ៊ុន Apple ក្នុងចំណោមក្រុមហ៊ុនដទៃទៀត។

ទន្ទឹមនឹងនេះ ការិយាល័យរបស់ លោក Carney បានឆ្លើយតបទៅនឹងការប្រកាសរបស់លោក Trump ដោយនិយាយថា «រដ្ឋាភិបាលកាណាដានឹងបន្តចូលរួមក្នុងការចរចាដ៏ស្មុគស្មាញទាំងនេះ ជាមួយសហរដ្ឋអាមេរិក ដើម្បីផលប្រយោជន៍ល្អបំផុតរបស់បុគ្គលិក និងអាជីវកម្មកាណាដា»។