ប្រជាជនអ៊ីរ៉ង់រាប់ពាន់នាក់ បានប្រមូលផ្តុំគ្នា នៅក្នុងទីក្រុងតេអេរ៉ង់ នៅថ្ងៃសៅរ៍ (ទី២៨ ខែមិថុនា) សម្រាប់ពិធីបុណ្យសពរបស់មេបញ្ជាការយោធា និងអ្នកវិទ្យាសាស្ត្រនុយក្លេអ៊ែរដែលត្រូវបានសម្លាប់ នៅក្នុងការវាយប្រហាររបស់អ៊ីស្រាអែល ក្នុងអំឡុងពេលជម្លោះរវាងអ៊ីរ៉ង់ និងអ៊ីស្រាអែលក្នុងខែនេះ។

មឈូសរបស់អ្នកស្លាប់ ត្រូវបានគេដឹកតាមរថយន្តដឹកជញ្ជូនតាមផ្លូវដែលមានមនុស្សកកកុញ ខណៈអ្នកកាន់ទុក្ខទាំងអស់ បានក្រោកឈរ ហើយគោរព។

អ៊ីស្រាអែល បានវាយលុកយ៉ាងខ្លាំងទៅលើទីបញ្ជាការរបស់កងឆ្មាំបដិវត្តន៍ឥស្លាម (IRGC) ក្នុងអំឡុងពេលយុទ្ធនាការយោធារបស់ខ្លួន ដែលបានចាប់ផ្តើម នៅថ្ងៃទី ១៣ ខែមិថុនា ដោយបានសម្លាប់អគ្គមេ បញ្ជាការលោកឧត្តមសេនីយ៍ឯក Hossein Salami មេបញ្ជាការកងកម្លាំងអាកាសរបស់ IRGC លោក  Amir Ali Hajizadeh និងឧត្តមសេនីយ៍ឯក Golamali Rashid ក្នុងចំណោមអ្នកផ្សេងទៀត។

កងឆ្មាំបដិវត្តន៍ឥស្លាម (IRGC) ត្រួតពិនិត្យកម្មវិធីបាលីស្ទីករបស់អ៊ីរ៉ង់ ដែលអ្នកជំនាញចាត់ទុកថា ជាកម្មវិធីធំបំផុត នៅមជ្ឈិមបូព៌ា។ កងឆ្មាំបដិវត្តន៍នេះ បានបាញ់មីស៊ីលស្រោចទៅលើអ៊ីស្រាអែល ក្នុងអំឡុងពេលជម្លោះចុងក្រោយបំផុត ដូចដែលខ្លួនបានធ្វើកាលពីឆ្នាំមុន ក្នុងអំឡុងពេលមានការបាញ់ប្រហារគ្នាទៅវិញទៅមក។