សេចក្តីសម្រេចរបស់តុលាការកំពូលសហរដ្ឋអាមេរិក ទាក់ទងនឹងសិទ្ធិជាពលរដ្ឋពីកំណើត បានជំរុញឱ្យមានការភាន់ច្រឡំ ភាពច្របូកច្របល់ និងការហៅទូរសព្ទបន្ទាន់ទៅកាន់មេធាវី ខណៈជនអន្តោប្រវេសន៍ដែលអាចរងផលប៉ះពាល់ពីសាលដីកានោះ បានព្យាយាមស្វែងយល់ខ្លឹមសារនៃសេចក្តីសម្រេចផ្លូវច្បាប់ដ៏ច្របូកច្របល់ ជាមួយនឹងផលប៉ះពាល់មនុស្សធម៌សំខាន់ៗ។

គួរឱ្យដឹងថា តុលាការកំពូល កាលថ្ងៃសុក្រ (២៧ មិថុនា) បានផ្តល់ការអនុញ្ញាតដល់សំណើរបស់លោកប្រធានាធិបតី Donald Trump ក្នុងការទប់ស្កាត់សិទ្ធិអំណាចរបស់ចៅក្រមសហព័ន្ធ ប៉ុន្តែមិនបានសម្រេចឱ្យច្បាស់លាស់លើភាពស្របច្បាប់នៃសំណើរបស់លោកក្នុងការរឹតបន្តឹងសិទ្ធិទទួលបានសញ្ជាតិអាមេរិកពីកំណើត របស់ទារកដែលមានឪពុកម្ដាយជាជនអន្តោប្រវេសន៍នោះទេ។

លទ្ធផលនេះបានបង្កើនសំណួរច្រើនជាងចម្លើយ អំពីសិទ្ធិដ៏សំខាន់មួយដែលយល់ឃើញជាយូរមកហើយថាត្រូវបានធានាក្រោមរដ្ឋធម្មនុញ្ញសហរដ្ឋអាមេរិក ពោលគឺ "អ្នកណាម្នាក់ដែលកើតនៅក្នុងទឹកដីសហរដ្ឋអាមេរិក ត្រូវបានចាត់ទុកថាជាពលរដ្ឋអាមេរិកតាំងពីកំណើត"។ 

ជនអន្តោប្រវេសន៍ជាច្រើននិយាយថា ពួកគេកំពុងរកមើលព័ត៌មានលម្អិតថាតើសេចក្ដីសម្រេចនេះអាចប៉ះពាល់កូនៗដែលជិតនឹងកើតរបស់ពួកគេដូចម្ដេចខ្លះ ប៉ុន្តែបាននិយាយថា ពួកគេច្របូកច្របល់ និងបារម្ភណាស់ព្រោះតែពុំមានការបញ្ជាក់ច្បាស់លាស់ឡើយ។ 

លោក Trump ដែលជាមេដឹកនាំមកពីបក្សសាធារណរដ្ឋ បានចេញក្រឹត្យមួយបន្ទាប់ពីចូលកាន់តំណែងកាលពីខែមករា ដោយបញ្ជាទីភ្នាក់ងារសហរដ្ឋអាមេរិក ឱ្យបដិសេធមិនទទួលស្គាល់សញ្ជាតិរបស់ទារកដែលកើតនៅក្នុងសហរដ្ឋអាមេរិក ប្រសិនបើកុមារនោះពុំមានយ៉ាងហោចណាស់ម្នាក់ក្នុងចំណោមឪពុកម្តាយរបស់គេជាពលរដ្ឋអាមេរិក ឬអ្នករស់នៅអចិន្ត្រៃយ៍ស្របច្បាប់ទេនោះ៕