ហ្វូងអ្នកកាន់ទុក្ខរាប់ម៉ឺននាក់ ក្នុងសម្លៀកបំពាក់ពណ៌ខ្មៅ បានដើរតាមដងផ្លូវនៅរដ្ឋធានីតេអេរ៉ង់ របស់អ៊ីរ៉ង់ ខណៈប្រទេសនេះបានប្រារព្ធពិធីបុណ្យសពទ្រង់ទ្រាយធំមួយកាលពីថ្ងៃសៅរ៍ (២៨មិថុនា) សម្រាប់មេបញ្ជាការយោធាជាន់ខ្ពស់ អ្នកវិទ្យាសាស្ត្រនុយក្លេអ៊ែរ និងជនស៊ីវិលមួយចំនួនដែលត្រូវបានសម្លាប់ ក្នុងអំឡុងសង្គ្រាមដែនអាកាសក្នុងខែនេះជាមួយអ៊ីស្រាអែល។

យោងតាមប្រព័ន្ធផ្សព្វផ្សាយរដ្ឋបានឱ្យដឹងថា សាកសពរបស់អ្នកវិទ្យាសាស្ត្រយ៉ាងហោចណាស់ចំនួន ១៦នាក់ និងមេបញ្ជាការជាន់ខ្ពស់ចំនួន ១០នាក់ ត្រូវបានដង្ហែរក្នុងពិធីបុណ្យសព ក្នុងនោះរួមមានប្រមុខកងទ័ព លោក Mohammad Bagheri, មេបញ្ជាការកងឆ្មាំបដិវត្តន៍លោកឧត្តមសេនីយ Hossein Salami, និងប្រធានកងកម្លាំងឆ្មាំអាកាស លោកឧត្តមសេនីយ៍ Amir Ali Hajizadeh។

មឈូសរបស់ពួកគេត្រូវដង្ហែរចូលក្នុងទីលានចតុរង្គ Azadi នៃទីក្រុងតេអេរ៉ង់ ដែលគ្របដោយរូបថត និងក្រណាត់ទង់ជាតិ ខណៈហ្វូងមនុស្សបានគ្រវីទង់ជាតិ ហើយអ្នកខ្លះឈោងដៃទៅប៉ះមឈូស និងបោះផ្កាកូលាបលើនោះ។ ទូរទស្សន៍រដ្ឋនិយាយថា ពិធីបុណ្យសពត្រូវបានប្រារព្ធឡើងសម្រាប់មនុស្សសរុបចំនួន ៦០នាក់ ដែលត្រូវសម្លាប់ក្នុងសង្គ្រាម ក្នុងនោះមានស្ត្រី ៤នាក់ និងកុមារ ៤នាក់។

គួររម្លឹកថា អ៊ីស្រាអែលបានបើកសង្រ្គាមផ្លូវអាកាសកាលពីថ្ងៃទី១៣ ខែមិថុនា ដោយវាយលុកទីតាំងនុយក្លេអ៊ែរអ៊ីរ៉ង់ និងសម្លាប់មេបញ្ជាការយោធាជាន់ខ្ពស់ជាច្រើន ក៏ដូចជាជនស៊ីវិល នៅក្នុងការវាយប្រហារដ៏អាក្រក់បំផុតចំពោះសាធារណរដ្ឋអ៊ិស្លាមនេះ ចាប់តាំងពីសង្រ្គាមអំឡុងឆ្នាំ១៩៨០ ជាមួយអ៊ីរ៉ាក់មក៕