​ឥណ្ឌា៖ ទោះបីជា​មេឃ​ភ្លៀង និង​អាកាសធាតុ​ចុះ​ត្រជាក់ក៏ដោយ ​ប្រជាពលរដ្ឋ​ទូទៅ​រាប់​ពាន់​នាក់​បាន​សម្រុក​ទៅកាន់​ផ្សារ​ដ៏​មមាញឹក Chandni Chowk ដូច​ធម្មតា​នៅ​ក្នុង​ទីក្រុង New Delhi ភាគច្រើន​ពុំបាន​ពាក់​ម៉ាស់​ទេ​។​ បន្ទាប់ពី​សេចក្ដីប្រកាស​នៃ​បម្រាម​គោចរ​ពេលយប់ នៅ​ក្នុង​រដ្ឋធានី និង​រដ្ឋ​មួយ​ចំនួន​របស់​ប្រទេស​ឥណ្ឌា មនុស្ស​មួយ​ចំនួន​មាន​ក្ដី​បារម្ភ​ថា​ អាច​នឹង​មាន​ការ​បិទ​ខ្ទប់​ម្ដងទៀត និង​ការ​កើន​ឡើង​ករណី​ឆ្លង​វីរុស COVID-19​។

​ពាណិជ្ជករលោក Mohammad Saqib បាន​និយាយ​ថា មនុស្ស​ជាច្រើន​ព្រួយចិត្ត​ពី​ការ​ឆ្លង​ខ្លាំង ខណៈ​មនុស្ស​ជាច្រើន​បាន​បាត់បង់​សមាជិក​គ្រួសារ​ជាទី​ស្រឡាញ់​របស់​ពួកគេ​នៅ​ក្នុង​រលក​ទី​២ ​ដ៏​មហន្តរាយ​នៃ​ការ​ឆ្លង​វីរុស​នៅ​ក្នុង​ប្រទេស​ឥណ្ឌា​កាលពីដើម​ឆ្នាំនេះ ដែល​បាន​សម្លាប់​មនុស្ស​រាប់ពាន់​នាក់​។ អ្នក​រត់​រ៉ឺម៉ក​លោក Mahesh Kumar បាន​និយាយ​ថា អ្នកដំណើរ​របស់​លោក​មួយ​ចំនួន​មិនបាន​ពាក់​ម៉ាស់​ទេ ព្រោះ​ពួកគេ​មិន​ជឿ​ថា​មាន​ជំងឺ​នេះ​។ យោង​តាម​សារព័ត៌មាន the Times of India រហូតមកដល់​ពេល​នេះប្រទេស​ឥណ្ឌា​បាន​រក​ឃើញ​ករណី​ឆ្លង​វីរុស​ប​ម្លែ​ង​ខ្លួន​ថ្មី Omicron ចំនួន ៧១៧​នាក់​។

​ក្រុម​អ្នក​ជំនាញ​បាន​និយាយ​ថា ក្រុម​មន្ត្រី​បាន​សម្ដែង​ក្ដី​បារម្ភ​យ៉ាង​ខ្លាំងពី​ការ​កើន​ឡើង​ ករណី​ឆ្លង​វីរុស​ប​ម្លែ​ង​ខ្លួន​ថ្មី​នេះដែល​នាំ​ឲ្យ​ឈាន​ទៅ​រក​ការ​រឹតត្បិត​ការ​ធ្វើ​ដំណើរ ពង្រីក​ទីតាំង​ស្កែន​កំដៅ​ទ្រង់​ទ្រាយ​ធំ​នៅ​អាកាសយានដ្ឋាន​ផ្សេងៗ និង​បញ្ជូន​សារ​ព្រមាន​ស្ដីពី​សុខភាពសាធារណៈ​ផ្សេងៗ​។ គិត​ត្រឹម​ព្រឹក​នេះប្រទេស​ឥណ្ឌា​ដែល​មាន​ករណី​ឆ្លង​វីរុស​ COVID-19 សរុប​ខ្ពស់​បំផុត​ទី​២ ​បន្ទាប់ពី​សហរដ្ឋអាមេរិក​មាន​ករណី​ឆ្លង​សរុប​ចំនួន ៣៤,៨១៤,២៧១នាក់ និង​ស្លាប់​សរុប​ចំនួន ៤៨០,៥៩២​នាក់​៕

អត្ថបទ៖ សុខមាន