ត្បូងឃ្មុំ៖ ក្រោមការចាត់តាំងរបស់ឯកឧត្តមបណ្ឌិត ចាយ បូរិន ប្រធានក្រុមការងារចុះជួយស្រុកតំបែរ ខេត្តត្បូងឃ្មុំ កាលពីថ្ងៃទី៣០ ខែមិថុនា ឆ្នាំ២០២៥ ឯកឧត្តម ងួន ស្តេចភក្តី ប្រធានក្រុមការងារចុះជួយឃុំត្រពាំងព្រីង បានប្រគល់ផ្ទះ ១ខ្នង ជូនស្រ្តីមេម៉ាយ ដែលចិញ្ចឹមចៅកំព្រា និងងាយរងគ្រោះ ដែលខ្វះលទ្ធិភាពក្នុងការសង់ផ្ទះរស់នៅ។

ក្នុងឱកាសប្រគល់ផ្ទះ ជូនប្រជាពលរដ្ឋមានជីវភាពខ្វះខាតនេះ មានការចូលរួមពីលោក បណ្ឌិត ខាន់ ខុន អនុប្រធានក្រុមការងារ និងជាប្រធានសមាគមគ្រីស្ទបរិស័ទក្នុងសន្តិភាព និង Relevant Expeditions រួមទាំងលោក លោកស្រី ជាអនុប្រធាន សមាជិក សមាជិការចុះជួយមូលដ្ឋានឃុំត្រពាំងព្រីង អាជ្ញាធរមូលដ្ឋាន យុវជនសហភាពសហព័ន្ធយុវជនកម្ពុជា (ស.ស.យ.ក) កាកបាទក្រហមកម្ពុជា និងនិស្សិតពុទ្ធិកសាកលវិទ្យាល័យព្រះសីហមុនីរាជា ។

 លោក ខាន់ ខុន បានឲ្យដឹងថា ផ្ទះគឺជាតម្រូវការចាំបាច់ របស់មនុស្សយើងគ្រប់គ្នា ក្នុងការជ្រក់កោន បិទបាំងកម្ដៅថ្ងៃ ខ្យល់ និងទឹកភ្លៀងជាដើម ដូចនេះហើយ ដោយសារមានក្តីអាណិតអាសូរ ចំពោះប្រជាពលរដ្ឋដែលជាស្ត្រីមេម៉ាយ ហើយត្រូវរាប់រង់ចិញ្ចឹមចៅកំព្រាទៀតនោះ ទើបក្រុមការងារជួយសាងសងផ្ទះឲ្យគាត់ រស់នៅបានសមរម្យ និងទប់ស្កាត់នូវហានិភ័យនានា ។

 លោកបានបន្តថា ការផ្ដល់ជូនផ្ទះ ចំពោះប្រជាពលរដ្ឋមានជីវភាពខ្វះខាត ហើយគ្មានលទ្ធភាព ក្នុងការសាងសងផ្ទះសម្បែងនេះ គឺបានឆ្លើយតបទៅនឹងគោលនយោបាយរបស់រាជរដ្ឋាភិបាល ដែលមានសម្ដេចធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា គឺតែងតែគិតគូរពីសុខទុក្ខរបស់ប្រជាពលរដ្ឋ មិនចង់ឲ្យពលរដ្ឋណាម្នាក់មានការលំបាក ។

គួរបញ្ជាក់ថា ផ្ទះដែលប្រគល់ជូនពលរដ្ឋជាស្ត្រីមេម៉ាយនេះ មានទំហំ៤ម៉ែត្រ គុណនឹង ៥ម៉ែត្រ សំយាបមុខផ្ទះ ៣ម៉ែត្រ រួមទាំងសម្ភារមាន ពូក ខ្នើយកើយ ខ្នើយឱប ភួយ ទូដាក់សម្លៀកបំពាក់ ស្មាអាវ គ្រែ និងមុង សរុបជាថវិកាចំនួន៣៥០០ដុល្លារ ដែលបានឧបត្ថម្ភដោយ Joyce Meyer Ministries (Hand Of Hope) ។

នៅថ្ងៃដដែលនេះ ឯកឧត្តម ងួន ស្តេចភក្តី ជាព្រះរាជតំណាងសម្តេចព្រះមហាសង្ឃរាជ បួរ គ្រី ជាអម្ចាស់ បានចុះពិនិត្យមើលពីស្ថានភាពជាក់ស្តែង សំណេះសំណាល និងសួរសុខទុក្ខជាមួយលោកគ្រូ អ្នកគ្រូ នៅសាលាមតេយ្យសហគមន៍ភូមិបង្ហើរខ្លែង រួមទាំងផ្ដល់នូវសម្ភារដែលបម្រើដល់ការបង្រៀនសិស្ស មានដូចជាតុ និងក្ដាខៀន ហើយត្រៀមបើកសាលាបង្រៀនភាសាអង់គ្លេស សម្រាប់សិស្សក្នុងមូលដ្ឋាននេះ សិក្សាដោយឥតគិតថ្លៃ ៕ 

អត្ថបទ បាន សុខរិទ្ធិ