អតីតប្រធានាធិបតីកូរ៉េខាងត្បូង លោក Yoon Suk Yeol បានសម្រេចចិត្តមិនទៅចូលរួមក្នុងនីតិវិធីសាកសួរនៅថ្ងៃអង្គារ (០១ កក្កដា) នេះ ដោយរដ្ឋអាជ្ញាពិសេស ដែលស៊ើបអង្កេតការប្រកាសច្បាប់អាជ្ញាសឹកកាលពីខែធ្នូរបស់លោក ដោយលើកហេតុផលថាមានតម្រូវការត្រៀមខ្លួនសម្រាប់សវនាការនៅពេលក្រោយ បើទោះបីជាហានិភ័យនៃការចាប់ខ្លួនក៏ដោយ។

លោក Yoon ត្រូវបានបណ្តេញចេញពីតំណែងកាលពីខែមេសា ដោយតុលាការធម្មនុញ្ញ ដែលគាំទ្រការចោទប្រកាន់ពីសភា ជុំវិញការប្រកាសច្បាប់អាជ្ញាសឹករយៈពេលខ្លីរបស់លោក ដែលបានបង្កការភ្ញាក់ផ្អើលដល់ប្រជាជាតិកូរ៉េខាងត្បូង។

តាមរយៈមេធាវីរបស់ខ្លួន លោក Yoon ដែលជាអតីតរដ្ឋអាជ្ញាដ៏មានឥទ្ធិពលហើយបានជាប់ឆ្នោតជាប្រធានាធិបតីក្នុងឆ្នាំ២០២២ បានចោទប្រកាន់រដ្ឋអាជ្ញាពិសេសថាកំពុង "ប្រព្រឹត្តទង្វើតាមទម្លាក់កំហុសយ៉ាងអាក្រក់" ក្នុងគោលបំណងនយោបាយ ដោយពណ៌នាបណ្ដឹងនោះថាជាល្បិចកលមួយចំនួនដែលប្រើប្រឆាំងនឹងលោកដោយខុសច្បាប់។

នៅថ្ងៃចន្ទសប្ដាហ៍នេះ មេធាវីរបស់លោក Yoon បាននិយាយថា ថ្ងៃទី០៥ ខែកក្កដា គឺជាថ្ងៃឆាប់បំផុតដែលលោកនឹងអាចបង្ហាញខ្លួនដើម្បីសាកសួរ ពីព្រោះអតីតប្រធានាធិបតីរូបនេះនៅមានសវនាការរបស់តុលាការជុំវិញការចោទប្រកាន់បទបះបោរដាច់ដោយឡែកមួយ ដែលកំណត់សម្រាប់ថ្ងៃព្រហស្បតិ៍សប្ដាហ៍នេះដែលលោកត្រូវតែចូលរួម និងលើកឡើងពីសិទ្ធិរបស់លោក Yoon ក្នុងនាមជាចុងចោទដើម្បីអាចមានពេលសម្រាក និងរៀបចំខ្លួន៕