លោក António Costa ប្រធានក្រុមប្រឹក្សាសហភាពអឺរ៉ុប បានលើកឡើងនៅក្នុងបទសម្ភាសន៍មួយនាពេលថ្មីៗនេះថា លោករំពឹងថា ការសន្យាបង្កើនចំណាយលើវិស័យការពារជាតិចំនួន ៥% ថ្មីរបស់សមាជិកសម្ព័ន្ធយោធាណាតូ នឹងជួយត្រួសត្រាយផ្លូវសម្រាប់កិច្ចព្រមព្រៀងពាណិជ្ជកម្មមួយរវាងសហរដ្ឋអាមេរិក និងសហភាពអឺរ៉ុប ដែលអាចជួយសម្រាលដល់សង្រ្គាមពាណិជ្ជកម្ម។

ក្នុងបទសម្ភាសន៍ជាមួយកាសែត Wall Street Journal លោក Costa បាននិយាយថា បណ្ដាប្រទេសសហភាពអឺរ៉ុប នឹងទិញសព្វាវុធបន្ថែមពីសហរដ្ឋអាមេរិក ដោយនេះអាចកាត់បន្ថយឱនភាពពាណិជ្ជកម្ម ដែលជាចំណុចទាមទារដ៏សំខាន់មួយសម្រាប់លោកប្រធានាធិបតី Donald Trump នៅពេលអាមេរិក និងប្លុកអឺរ៉ុប ២៧ប្រទេសនេះ ស្វែងរកកិច្ចព្រមព្រៀងមួយនៅត្រឹមថ្ងៃផុតកំណត់ពន្ធទី០៩ ខែកក្កដា។

មេដឹកនាំណាតូ កាលពីសប្តាហ៍មុន បានឯកភាពគ្នាលើការដំឡើងការចំណាយលើវិស័យការពារជាតិដ៏ធំមួយ បន្ទាប់ពីប្រឈមនឹងសម្ពាធពីលោក Trump។ សម្ពាធបានកើនឡើងកាន់តែខ្លាំងក្នុងប៉ុន្មានសប្តាហ៍ថ្មីៗនេះ នៅពេលទីក្រុងវ៉ាស៊ីនតោន និងសហភាពអឺរ៉ុប ប្រឹងប្រែងសម្រេចកិច្ចព្រមព្រៀងពាណិជ្ជកម្មត្រឹមថ្ងៃទី០៩ ខែកក្កដា ដែលនឹងបញ្ចៀសពន្ធ ៥០% ដែលលោក Trump បានប្រកាសពីមុន។

លោក Trump បានរិះគន់ជាញឹកញាប់លើឱនភាពពាណិជ្ជកម្មជាប់លាប់របស់អាមេរិក ជាមួយសហភាពអឺរ៉ុប ដែលស្ថិតក្នុងតួលេខកំណត់ត្រា ១៦១ពាន់លានដុល្លារកាលពីឆ្នាំមុន នេះបើយោងតាមក្រសួងពាណិជ្ជកម្មអាមេរិក៕