តុលាការធម្មនុញ្ញរបស់ប្រទេសថៃ នៅថ្ងៃអង្គារ (០១ កក្កដា) នេះ បានសម្រេចចិត្តផ្អាកតំណែងរបស់នាយករដ្ឋមន្រ្តីថៃ លោកស្រី Paetongtarn Shinawatra ខណៈកំពុងបន្តរឿងក្ដីដែលស្វះស្វែងបណ្តេញលោកស្រីចេញពីតំណែងជាផ្លូវការ ដោយបន្ថែមសម្ពាធកាន់តែខ្លាំងឡើងទៅលើរដ្ឋាភិបាលដែលស្ថិតនៅក្រោមសម្ពាធជុំទិស និងជម្លោះផ្ទៃក្នុងដ៏ចម្រូងចម្រាសរួចទៅហើយ។

តុលាការធម្មនុញ្ញ បានកាត់សេចក្ដីក្នុងសំឡេងគាំទ្រ ៧ទល់នឹង២ ក្នុងការផ្អាកតំណែងលោកស្រី Paetongtarn ហើយក៏បានឯកភាពគ្នាជាឯកច្ឆ័ន្ទក្នុងការពិចារណាចោទប្រកាន់ទម្លាក់តំណែងផ្លូវការផងដែរ។ នៅក្នុងសេចក្តីថ្លែងការណ៍មួយ តុលាការបាននិយាយថា ខ្លួនបានទទួលយកញត្តិពីសមាជិកព្រឹទ្ធសភាចំនួន ៣៦រូប ដែលចោទលោកស្រី Paetongtarn ពីភាពមិនស្មោះត្រង់ និងបំពានក្រមសីលធម៌ដែលរំលោភដល់រដ្ឋធម្មនុញ្ញ។

រដ្ឋាភិបាលថៃ ត្រូវរំពឹងថានឹងដឹកនាំដោយឧបនាយករដ្ឋមន្ត្រីក្នុងសមត្ថភាពជានាយករដ្ឋមន្រ្តីចាំផ្ទះ ក្នុងពេលតុលាការបន្តជំនុំជម្រះលើក្ដីប្រឆាំងនឹងលោកស្រី Paetongtarn ខណៈនាយករដ្ឋមន្រ្តីដែលទើបត្រូវផ្អាកពីតំណែងរូបនេះនឹងបន្តនៅក្នុងគណៈរដ្ឋមន្ត្រីជារដ្ឋមន្ត្រីក្រសួងវប្បធម៌ថ្មី បន្ទាប់ពីមានការរុះរើ។

សមរភូមិតុលាការ និងនយោបាយរបស់លោកស្រី Paetongtarn បន្ទាប់ពីកាន់អំណាចបានត្រឹមតែ ១០ខែ បានគូសបញ្ជាក់ពីការធ្លាក់ចុះនៃកម្លាំងរបស់គណបក្សភឿថៃ ដែលគ្របដណ្ដប់ការបោះឆ្នោតថៃ ចាប់តាំងពីឆ្នាំ២០០១មក ការស៊ូទ្រាំនឹងរដ្ឋប្រហារយោធា និងសេចក្តីសម្រេចរបស់តុលាការ ដែលបានផ្តួលរំលំរដ្ឋាភិបាល និងមើលឃើញនាយករដ្ឋមន្ត្រីជាច្រើនរូបត្រូវធ្លាក់ពីតំណែង៕