ប្រព័ន្ធផ្សព្វផ្សាយរដ្ឋរុស្ស៊ី និងអ្នកសរសេរប្លុកគាំទ្រសង្គ្រាមបានអះអាងថា កងកម្លាំងទីក្រុងមូស្គូ វាយដណ្ដើមបានភូមិមួយក្នុងតំបន់ Dnipropetrovsk អ៊ុយក្រែន ដែលជាលើកដំបូងក្នុងការវាយលុករយៈពេល ៣ឆ្នាំរបស់ពួកគេ នៅក្នុងសញ្ញានៃការវាយប្រហារផ្លូវចិត្តដ៏ធំដែលអាចកើតមានចំពោះអ៊ុយក្រែន។

មិនមានការបញ្ជាក់ភ្លាមៗពីមន្ត្រីអ៊ុយក្រែន ឬពីក្រសួងការពារជាតិរុស្ស៊ីទេ។ ទីភ្នាក់ងារសារព័ត៌មានរដ្ឋ RIA របស់រុស្ស៊ី បានដកស្រង់សម្តីមន្ត្រីដ៏មានឥទ្ធិពលម្នាក់ដែលគាំទ្ររុស្ស៊ី គឺលោក Vladimir Rogov ដោយនិយាយថា កងកម្លាំងរុស្ស៊ី បានកាន់កាប់ភូមិ Dachnoye នៅខាងក្នុងតំបន់ Dnipropetrovsk រួចហើយ។

កាលពី ៣សប្តាហ៍មុន មន្ត្រីរុស្ស៊ីបានអះអាងស្រដៀងគ្នានេះថា កងកម្លាំងរបស់ពួកគេបានរុសចូលទៅក្នុងតំបន់ Dnipropetrovsk ភាគខាងកើតរបស់អ៊ុយក្រែន ប៉ុន្តែអាជ្ញាធរអ៊ុយក្រែនប្រកែកថា ការវាយប្រហារនេះត្រូវបានវាយបកទៅវិញអស់ហើយ។

តំបន់ Dnipropetrovsk ដែលស្ថិតនៅភាគខាងលិចនៃតំបន់ Donetsk គឺមិនស្ថិតក្នុងចំណោមតំបន់ទាំង៥ របស់អ៊ុយក្រែន ដែលរុស្ស៊ី បានអះអាងសិទ្ធិថាជាទឹកដីផ្លូវការរបស់ខ្លួននោះទេ។ ក្នុងអំឡុងពេលកិច្ចចរចាសន្តិភាពនៅទីក្រុងអ៊ីស្តង់ប៊ុលនាពេលថ្មីៗនេះ រវាងទីក្រុងមូស្គូ និងទីក្រុងគីវ ក្រុមមន្ត្រីរុស្ស៊ីបានគំរាមអ៊ុយក្រែនថានឹងវាយដណ្តើមយកទឹកដីបន្ថែមទៀត លុះត្រាតែអ៊ុយក្រែន ព្រមចុះហត្ថលេខាលើកិច្ចព្រមព្រៀងសន្តិភាពស្របតាមលក្ខខណ្ឌរបស់រុស្ស៊ី៕