អ៊ីស្រាអែល៖ ប្រទេសអ៊ីស្រាអែលបានទទួលការដឹកជញ្ជូនឱសថគ្រាប់ Paxlovid របស់ក្រុមហ៊ុន Pfizer លើកដំបូងរបស់ខ្លួនកាលពីថ្ងៃព្រហស្បតិ៍ ដោយក្លាយជាប្រទេសមួយក្នុងចំណោមប្រទេសដំបូងគេ ទទួលបានឱសថគ្រាប់ព្យាបាលជំងឺ COVID-19។ ឱសថ Paxlovid គឺជាឱសថគ្រាប់ដំបូងដែលត្រូវបានអនុម័តសម្រាប់ការព្យាបាលជំងឺ COVID-19។
ឱសថនេះអាចលេបនៅលំនៅឋានដើម្បីការពាររោគសញ្ញាធ្ងន់ធ្ងរបំផុតនៃវីរុសឆ្លង។ ប្រទេសអ៊ីស្រាអែលគឺជាប្រទេសមួយក្នុងចំណោមប្រទេសដំបូងគេ ដែលដាក់ឱ្យប្រើប្រាស់វ៉ាក់សាំងការពារវីរុសឆ្លងរបស់ក្រុមហ៊ុន Pfizer កាលពីមួយឆ្នាំមុន ហើយបានចាប់ផ្តើមផ្តល់ដោយសេរីនូវវ៉ាក់សាំងដូសជំរុញកាលពីរដូវក្តៅមុន។ ប៉ុន្តែប្រទេសនេះនៅតែឃើញរលកនៃការឆ្លង ដែលត្រូវបានដាក់កំហុសលើវីរុសបម្លែងខ្លួនថ្មី Delta ហើយក្រុមមន្ត្រីបានព្រមានអំពីកត្តាមួយផ្សេងទៀតដែលជំរុញដោយវីរុសបម្លែងខ្លួនថ្មី omicron ដែលឆ្លងរាលដាលបានយ៉ាងឆាប់រហ័ស។ បច្ចុប្បន្នប្រទេសអ៊ីស្រាអែលមានអ្នកជំងឺនៅព្យាបាលជាង ២២,៧៨០នាក់រួមទាំង ៩៤នាក់ស្ថិតក្នុងស្ថានភាពធ្ងន់ និងមានអ្នកស្លាប់ ៨,២៤៣នាក់ដោយសារវីរុស COVID-19 នៅក្នុងប្រទេសអ៊ីស្រាអែល ខណៈមានអ្នកអ្នកឆ្លងសរុប ១,៣៨០,០៥៣ករណីចាប់តាំងពីការចាប់ ផ្តើមនៃជំងឺរាតត្បាត។
អ៊ីស្រាអែលបានអនុម័តការចាក់វ៉ាក់សាំងលើកទី៤ សម្រាប់អ្នកដែលងាយរងគ្រោះបំផុតពីវីរុស COVID-19 ដោយក្លាយជាប្រទេសមួយក្នុងចំណោមប្រទេសដំបូងគេដែលចាក់វ៉ាក់សាំងដូសទី៤ ដោយសារប្រទេសនេះទប់ស្កាត់នឹងរលកនៃការឆ្លងដែល បណ្តាលមកពីវីរុសបម្លែហខ្លួនថ្មី omicron។ លោក Nachman Ash អគ្គនាយកនៃក្រសួងសុខាភិបាល បានប្រកាសពីការសម្រេចក្នុងសន្និសីទសារព័ត៌មានមួយកាលពីល្ងាចថ្ងៃព្រហស្បតិ៍។ លោកនិយាយថា ការសម្រេចនេះគឺផ្អែកលើការស្រាវជ្រាវដំបូង ហើយមន្ត្រីនឹងពិចារណាពង្រីកការផ្តល់វ៉ាក់សាំងដូសទី៤ ដល់សាធារណជនបន្ថែមទៀត ខណៈក្រុមមន្ត្រីវាយតម្លៃពីស្ថានភាព៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
