លោកអធិការបតី Friedrich Merz នៅថ្ងៃអង្គារ (ទី១ ខែកក្កដា) នេះ បាននិយាយថា ប្រទេសអាល្លឺម៉ង់ចង់រក្សាទុកតំបន់ Schengen របស់សហភាពអឺរ៉ុប (EU) ជាតំបន់ដែលអនុញ្ញាតមានការធ្វើដំណើរដោយសេរី ប៉ុន្តែវាអាចដំណើរការបាន លុះណាត្រាតែវាមិនត្រូវបានរំលោភបំពានដោយឧក្រិដ្ឋជនដែលរត់ពន្ធជនអន្តោប្រវេសន៍។

អំឡុងសន្និសីទសារព័ត៌មានមួយជាមួយសមភាគីរបស់លោកពីប្រទេសលុចសំបួ លោក Merz បានលើកឡើងថា៖ «តាមធម្មតា យើងចង់ការពារតំបន់ Schengen នេះ ប៉ុន្តែសេរីភាពនៃការធ្វើដំណើរ នៅក្នុងតំបន់ Schengen នឹងដំណើរការក្នុងរយៈពេលយូរ លុះត្រាណាតែវាមិនត្រូវបានរំលោភបំពាន ដោយអ្នកដែលជួយដល់ការធ្វើអន្តោប្រវេសន៍ខុសច្បាប់ ជាពិសេសដោយអំពើរត់ពន្ធជនអន្តោប្រវសន៍»។

ជាមួយគ្នានេះ លោក Merz ក៏បានបញ្ជាក់ផងដែរថា ប្រទេសអាល្លឺម៉ង់កំពុងធ្វើការយ៉ាងជិតស្និទ្ធជាមួយប៉ូឡូញ ជុំវិញការគ្រប់គ្រងព្រំដែន ជាកិច្ចប្រឹងប្រែង ដើម្បីដោះស្រាយបញ្ហាអន្តោប្រវេសន៍ខុសច្បាប់។

លោក Merz បាននិយាយថា៖ «មានកិច្ចសហប្រតិបត្តិការយ៉ាងជិតស្និទ្ធ មិត្តភាព និងយោគយល់គ្នា រវាងប្រមុខរដ្ឋាភិបាល ពោលគឺរវាង (នាយករដ្ឋមន្ត្រីប៉ូឡូញ) លោក Donald Tusk និងខ្ញុំ ហើយនិងរវាងរដ្ឋមន្ត្រីក្រសួងមហាផ្ទៃ ពីព្រោះយើងចង់ដោះស្រាយបញ្ហានេះរួមគ្នា»៕