អង្គការសប្បុរសធម៌ និងអង្គការក្រៅរដ្ឋាភិបាលផ្សេងទៀតសរុបជាង ១៧០ក្រុម កំពុងអំពាវនាវឱ្យបិទគម្រោងចែកចាយជំនួយដ៏ចម្រូងចម្រាសនៅក្នុងតំបន់ហ្កាហ្សា គ្រប់គ្រងដោយមូលនិធិមនុស្សធម៌ហ្កាហ្សា (GHF) ដែលគាំទ្រដោយអ៊ីស្រាអែល និងសហរដ្ឋអាមេរិក។

សេចក្តីថ្លែងការណ៍រួមបាននិយាយថា ជនជាតិប៉ាឡេស្ទីនជាង ៥០០នាក់ ត្រូវបានសម្លាប់ ខណៈកំពុងស្វែងរកជំនួយចាប់តាំងពីក្រុម GHF នោះបានចាប់ផ្តើមប្រតិបត្តិការនៅចុងខែឧសភាមក នៅពេលដែលអ៊ីស្រាអែល បន្ធូរបន្ថយផ្នែកខ្លះនៃការបិទផ្លូវទាំងស្រុងអស់ ១១សប្តាហ៍របស់ខ្លួន។

អង្គការនានា រួមទាំង Oxfam និងអង្គការសង្រ្គោះកុមារ (Save the Children) និយាយថា កងកម្លាំងអ៊ីស្រាអែល និងក្រុមប្រដាប់អាវុធ "តែងតែ" បើកការបាញ់ប្រហារលើជនប៉ាឡេស្ទីន ដែលស្វែងរកជំនួយ។



អ៊ីស្រាអែលបដិសេធថា ទាហានរបស់ខ្លួនពុំមានចេតនាបាញ់ទៅលើអ្នករកជំនួយទេ ហើយនិយាយថា ប្រព័ន្ធរបស់ក្រុម GHF បានផ្តល់ជំនួយផ្ទាល់ដល់អ្នកដែលត្រូវការ ហើយអាចរារាំងការជ្រៀតជ្រែករបស់ក្រុមហាម៉ាស។ ក្រុម GHF និយាយថា ខ្លួនបានផ្តល់ជាង ៥២លានអាហារ ក្នុងពេល ៥សប្តាហ៍ ហើយថាអង្គការផ្សេងទៀត "ធ្វើអ្វីមិនបានសោះ នៅពេលជំនួយរបស់ពួកគេត្រូវបានលួច"។

ទោះយ៉ាងនេះក្ដី សេចក្តីថ្លែងការណ៍រួមកាលពីថ្ងៃអង្គារ (០១ កក្កដា) ពីអង្គការសប្បុរសធម៌ និងអង្គការក្រៅរដ្ឋាភិបាលធំៗមួយចំនួនរបស់ពិភពលោក និយាយថា GHF កំពុងរំលោភលើបទដ្ឋានទាំងអស់នៃការងារមនុស្សធម៌ រួមទាំងការបង្ខំឱ្យមនុស្ស ២លាននាក់ សម្រុកចូលទៅយកជំនួយក្នុងតំបន់ដ៏តូចចង្អៀតណែនតាន់តាប់ និងតំបន់យោធា ដែលពួកគេប្រឈមមុខនឹងការបាញ់ប្រហារជារៀងរាល់ថ្ងៃ។

ចាប់តាំងពី GHF បានចាប់ផ្តើមប្រតិបត្តិការនៅតំបន់ហ្កាហ្សាមក មានរបាយការណ៍ស្ទើរតែរាល់ថ្ងៃនៃកងកម្លាំងអ៊ីស្រាអែលបាញ់សម្លាប់មនុស្សដែលកំពុងស្វែងរកជំនួយនៅទីតាំងទាំងនោះ ពីក្រុមគ្រូពេទ្យ សាក្សីផ្ទាល់ភ្នែក និងក្រសួងសុខាភិបាលដែលគ្រប់គ្រងដោយក្រុមហាម៉ាសនៃដែនដីនេះ៕