ប្រមុខតំបន់គាំទ្រដោយរុស្ស៊ីបានប្រាប់ទូរទស្សន៍រដ្ឋរុស្ស៊ីថា រុស្ស៊ីបានគ្រប់គ្រងទាំងស្រុងលើតំបន់ Luhansk ភាគខាងកើតរបស់អ៊ុយក្រែន ជាងបីឆ្នាំបន្ទាប់ពីប្រធានាធិបតីលោក Vladimir Putin បានបញ្ជាកងទ័ពរាប់ពាន់នាក់ចូលក្នុងប្រទេសជិតខាងអ៊ុយក្រែន កាលពីខែកុម្ភៈ ឆ្នាំ២០២២។

តំបន់ Luhansk ដែលមានផ្ទៃដី ២៦.៧០០ គីឡូម៉ែត្រក្រឡា គឺជាតំបន់របស់អ៊ុយក្រែនដំបូងគេដែលស្ថិតនៅក្រោមការគ្រប់គ្រងទាំងស្រុងរបស់កងកម្លាំងរុស្ស៊ី ចាប់តាំងពីរុស្ស៊ីបានដាក់បញ្ចូលឧបទ្វីប      គ្រីម៉េ (Crimea) ក្នុងឧបសម្ព័ន្ធរបស់ខ្លួនកាលពីឆ្នាំ ២០១៤។

លោកប្រធានាធិបតីរុស្ស៊ី កាលពីខែកញ្ញាឆ្នាំ ២០២២ បានប្រកាសថាតំបន់ Luhansk រួមទាំងតំបន់ Donetsk, Kherson និង Zaporizhzhia ដែលគ្រប់គ្រងដោយផ្នែក  កំពុងត្រូវបានដាក់បញ្ចូលក្នុងឧបសម្ព័ន្ធរបស់ប្រទេសរុស្ស៊ី ជាជំហានមួយដែលបណ្ដារដ្ឋអឺរ៉ុបខាងលិច បាននិយាយថាខុសច្បាប់ ហើយពិភពលោកភាគច្រើនពុំទទួលស្គាល់។

លោក Leonid Pasechnik ដែលបានកើតនៅសាធារណរដ្ឋសង្គមនិយមសូវៀតអ៊ុយក្រែន ហើយឥឡូវនេះជាមន្ត្រីដែលលើកបន្តុបដោយរុស្ស៊ី ជាប្រមុខដឹកនាំសាធារណរដ្ឋប្រជាមានិត Luhansk បានប្រាប់ទូរទស្សន៍រដ្ឋរុស្ស៊ីថា ទឹកដីនៃសាធារណរដ្ឋប្រជាមានិត Luhansk ត្រូវបានរំដោះពេញលេញ១០០ភាគរយ។  

ពុំមានការបញ្ជាក់ភ្លាមៗពីក្រសួងការពារជាតិរុស្ស៊ី ឬការអត្ថាធិប្បាយពីអ៊ុយក្រែននោះទេ៕