លោក Donald Trump បាននិយាយកាលពីថ្ងៃពុធ ទី២ ខែកក្កដា ថា សហរដ្ឋអាមេរិក នឹងដាក់ការដំឡើងពន្ធ២០ភាគរយដែលទាបជាងការសន្យាកាលពីពេលមុនលើការនាំចេញទំនិញជាច្រើនមុខរបស់ប្រទេសវៀតណាម ដែលធ្វើឲ្យភាពតានតឹងកាន់មានភាពធូរស្រាលជាមួយដៃគូពាណិជ្ជកម្មធំបំផុតទី១០របស់ខ្លួន មុនពេលប្រធានាធិបតីអាមេរិក អាចដំឡើងពន្ធលើការនាំចូលភាគច្រើន។

លោកនិយាយថា ទំនិញរបស់ប្រទេសវៀតណាមនឹងប្រឈមការដំឡើងពន្ធ២០ភាគរយ ហើយការដឹកជញ្ជូនឆ្លងកាត់ពីប្រទេសទីបីតាមរយៈប្រទេសវៀតណាមនឹងប្រឈមការយកពន្ធ៤០ភាគរយ។ លោកបាននិយាយបន្ថែមថា ប្រទេសវៀតណាមអាចនាំចូលផលិតផលរបស់សហរដ្ឋអាមេរិក ដោយការដំឡើងពន្ធសូន្យភាគរយ។

នៅលើបណ្តាញសង្គម Truth Social លោក Trump បាននិយាយបន្ទាប់ពីបានពិភាក្សាជាមួយមេដឹកនាំជាន់ខ្ពស់របស់វៀតណាម លោក To Lam ថា «វាជាកិត្តិយសដ៏អស្ចារ្យរបស់ខ្ញុំដើម្បីប្រកាសថា ខ្ញុំមានកិច្ចព្រមព្រៀងពាណិជ្ជកម្មជាមួយសាធារណរដ្ឋសង្គមនិយមវៀតណាម»។ ការប្រកាសរបស់លោក Trump ធ្វើឡើងតែប៉ុន្មានថ្ងៃនៅមុនថ្ងៃផុតកំណត់នៅថ្ងៃទី៩ ខែកក្កដា មុនពេលដែលលោកដំឡើងពន្ធលើការនាំចូលភាគច្រើន។

នៅក្រោមផែនការ ដែលត្រូវបានប្រកាសកាលពីខែមេសា អ្នកនាំចូលទំនិញវៀតណាមទៅសហរដ្ឋអាមេរិក នឹងត្រូវបង់ពន្ធ៤៦ភាគរយ។ វាមិនច្បាស់នោះទេថាតើផលិតផលណាដែលពន្ធ២០ភាគរយរបស់លោក Trump នឹងត្រូវអនុវត្ត ឬថាតើផលិតផលមួយចំនួនណាខ្លះមានលក្ខណៈគ្រប់គ្រាន់សម្រាប់ទម្លាក់ការដំឡើងពន្ធសរុប ឬពន្ធខ្ពស់ជាងនេះ។