សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ផ្ដាំទៅក្រុមប្រឆាំងជ្រុលនិយមនៅក្រៅស្រុកថា កុំភ័យបើខ្លួនមិនខុស ដែលរាជរដ្ឋាភិបាលកំពុងធ្វើវិសោធនកម្មច្បាប់រដ្ឋធម្មនុញ្ញ ដើម្បីដកសញ្ជាតិជនទាំងឡាយណា ដែលគប់គិតជាមួយបរទេសបំផ្លាញផលប្រយោជនជាតិខ្មែរ ពីព្រោះច្បាប់នេះ អនុវត្តតែចំពោះជនក្បត់ជាតិមានទោសទណ្ឌធ្ងន់ធ្ងរ ទៅចូលដៃជាមួយបរទេសមកបំផ្លាញជាតិខ្មែរតែប៉ុណ្ណោះ ដោយមិនបង្កផលប៉ះពាល់ដល់អ្នកដែលប្រឆាំងដើម្បីផលប្រយោជន៍ជាតិពិតប្រាកដនោះទេ។



សម្តេចធិបតី នាយករដ្ឋមន្ត្រី បានចំអកទៅក្រុមប្រឆាំងបែបនេះ ក្នុងឱកាសអញ្ជើញបើកការដ្ឋានសាសង់អគារទីស្នាក់ការគណបក្សប្រជាជនកម្ពុជា ខេត្តកំពង់ធំ ព្រឹកថ្ងៃទី៣ ខែកក្កដា ឆ្នាំ២០២៥នេះ។

សូមបញ្ជាក់ថា កាលពីថ្ងៃទី២ ខែកក្កដា ម្សិលមិញនេះ ក្រុមប្រឹក្សាធម្មនុញ្ញ បានបើកកិច្ចប្រជុំបឋម និងកិច្ចប្រជុំពេញអង្គ ពិនិត្យ ពិភាក្សា និងរៀបចំសេចក្តីក្រាបបង្គំទូលថ្វាយមតិ ដល់ព្រះមហាក្សត្រនៃព្រះរាជាណាចក្រកម្ពុជា លើសេចក្តីស្នើសុំធ្វើវិសោធនកម្មមាត្រា ៣៣ នៃរដ្ឋធម្មនុញ្ញនៃព្រះរាជាណាចក្រកម្ពុជា។ ក្នុងនោះក្រុមប្រឹក្សាធម្មនុញ្ញបានក្រាបបង្គំទូលថ្វាយ ព្រះករុណាជាអម្ចាស់ជីវិតលើត្បូថា សេចក្តីស្នើសុំធ្វើវិសោធនកម្មមាត្រា ៣៣ នៃរដ្ឋធម្មនុញ្ញនៃព្រះរាជណាចក្រកម្ពុជាគឺអាចធ្វើទៅបាន។