រដ្ឋអាជ្ញាសហព័ន្ធនិយាយថា រដ្ឋាភិបាលកូរ៉េខាងជើង ដែលជួបការលំបាកក្រោមទម្ងន់ទណ្ឌកម្មអន្តរជាតិ បានជ្រៀតចូលអស់ពេលជាច្រើនឆ្នាំក្នុងក្រុមហ៊ុននានានៅសហរដ្ឋអាមេរិក និងកន្លែងផ្សេងទៀតទូទាំងពិភពលោក ជាមួយនឹងបុគ្គលិកបច្ចេកវិទ្យាធ្វើការពីចម្ងាយរបស់ខ្លួន ដែលក្លែងបន្លំអត្តសញ្ញាណដើម្បីបង្កើតប្រាក់ចំណូលឱ្យរដ្ឋ។

រដ្ឋអាជ្ញាបាននិយាយក្នុងការចោទប្រកាន់ចំនួនពីរនៅតុលាការសហព័ន្ធក្នុងរដ្ឋ Massachusetts និង Georgia ថា៖ ដោយកេងប្រយោជន៍ពីតម្រូវការសកលសម្រាប់បុគ្គលិកជំនាញបច្ចេកវិទ្យា និងកំណើនការងារពីចម្ងាយ ប្រទេសកូរ៉េខាងជើង បានរកឃើញវិធីសាស្រ្តនោះដើម្បីគេចពីទណ្ឌកម្មរបស់អង្គការសហប្រជាជាតិ និងសហរដ្ឋអាមេរិក ដែលបានដាក់លើខ្លួនដោយសារតែកម្មវិធីអាវុធនុយក្លេអ៊ែរ។

ក្នុងប៉ុន្មានឆ្នាំចុងក្រោយនេះ ការប៉ុនប៉ងរបស់កូរ៉េខាងជើង ដើម្បីគេចពីទណ្ឌកម្មដោយប្រើប្រាស់អត្តសញ្ញាណមិនពិត បាននិងកំពុងបង្កើនក្ដីបារម្ភកាន់តែខ្លាំងឡើង។ យោងតាមរបាយការណ៍មួយពីក្រុមចារកម្មហានិភ័យរបស់ Google ក្នុងខែមេសា បានឱ្យដឹងថា មានភស្តុតាងដែលបង្ហាញថា ប្រតិបត្តិការបែបនេះបានពង្រីកភូមិសាស្ត្រ ដោយដាក់គោលដៅលើអឺរ៉ុបជាពិសេស។

រដ្ឋអាជ្ញាបាននិយាយថា គម្រោងនេះបង្កើតបានប្រហែល ៥លានដុល្លារអាមេរិក ឱ្យកូរ៉េខាងជើង និងធ្វើឱ្យអាជីវកម្មអាមេរិកខាតបង់ប្រហែល ៣លានដុល្លារអាមេរិកក្នុង ទាំងការខូចខាត និងការចំណាយ៕