លោក Anutin Charnvirakul ពិភាក្សាអំពីសំណើរបស់គណបក្ស People’s Party (បក្សប្រជាជន) ក្នុងការបោះឆ្នោតគាំទ្រឲ្យលោកកាន់តំណែងនាយករដ្ឋមន្ត្រី ក្រោមរដ្ឋាភិបាលបណ្ដោះអាសន្ន ដោយមានការធ្វើវិសោធនកម្មរដ្ឋធម្មនុញ្ញជាមុនសិន មុនពេលការបោះឆ្នោតថ្មីត្រូវបានរៀបចំឡើង។

លោក Anutin Charnvirakul សមាជិកសភាក្នុងបញ្ជីបក្ស និងជាប្រមុខគណបក្ស Bhumjaithai (ភូមិចៃថៃ) បាននិយាយនៅថ្ងៃព្រហស្បតិ៍ (ទី៣ ខែកក្កដា) នេះ នៅឯរដ្ឋសភា ទាក់ទងនឹងសំណើរបស់បក្ស People's Party ក្នុងការបោះឆ្នោតជ្រើសរើសលោកជានាយករដ្ឋមន្ត្រី ប៉ុន្តែនេះគ្រាន់តែស្ថិតនៅក្រោមលក្ខខណ្ឌនៃរដ្ឋាភិបាលបណ្តោះអាសន្ន និងការធ្វើវិសោធនកម្មរដ្ឋធម្មនុញ្ញប៉ុណ្ណោះ មុនពេលរំលាយសភា ដើម្បីរៀបចំការបោះឆ្នោតថ្មី។

លោកបានបញ្ជាក់ថា លោកនឹងពិភាក្សាបញ្ហានេះជាដំបូងជាមួយ លោក Natthaphong Ruengpanyawut សមាជិកសភាក្នុងបញ្ជីបក្ស និងជាប្រមុខគណបក្សប្រជាជន ក្នុងឋានៈជាប្រធានក្រុមប្រឆាំង ហើយនឹងស្តាប់សំណើនេះដោយផ្ទាល់។ ជាមួយគ្នានេះ លោកបានសម្តែងក្ដីបារម្ភ ចំពោះសេចក្តីថ្លែងការណ៍ចម្រុះពីបុគ្គលផ្សេងៗ ហើយបានសង្កត់ធ្ងន់ពីតម្រូវការ ក្នុងការមានទំនាក់ទំនងគ្នាដោយផ្ទាល់។ បន្ទាប់មក កិច្ចពិភាក្សាអំពីសំណើនេះ នឹងធ្វើឡើងក្នុងគណបក្ស Bhumjaithai។

លើសពីនេះទៀត លោក Anutin ក៏បានបញ្ជាក់ផងដែរថា បក្ស Bhumjaithai កំពុងចូលរួមជាមួយគណបក្សប្រឆាំង រួមជាមួយគណបក្សនយោបាយចំនួន ៤ ផ្សេងទៀត។ លោក Anutin បានអះអាងបន្ថែមថា បក្ស Bhumjaithai នឹងបំពេញតួនាទីរបស់ខ្លួនយ៉ាងពេញលេញ ក្នុងការតាមមើលរដ្ឋាភិបាល រួមនឹងគណបក្សប្រឆាំងផ្សេងទៀត៕