ឆ្មាំស៊ីវិលរបស់អេស្ប៉ាញ បានឲ្យដឹងថា ខ្សែប្រយុទ្ធសញ្ជាតិព័រទុយហ្គាល់ Diogo Jota របស់ក្រុមហង្សក្រហម Liverpool និងប្អូនប្រុសរបស់គេ ឈ្មោះ Andre Silva បានបាត់បង់ជីវិត ក្នុងហេតុការណ៍គ្រោះថ្នាក់ចរាចរណ៍ នៅជិតទីក្រុង Zamora ភាគពាយ័ព្យនៃប្រទេសអេស្ប៉ាញ នាថ្ងៃព្រហស្បតិ៍ (ទី៣ ខែកក្កដា) នេះ។

ប្អូនប្រុសរបស់កីឡាករ Jota គឺ Andre អាយុ ២៦ឆ្នាំ ក៏ជាកីឡាករបាល់ទាត់អាជីពម្នាក់ដែរ ដោយលេងឲ្យក្រុមនៅលីគលំដាប់ទី២ របស់ព័រទុយហ្គាល់ គឺក្លិប FC Penafiel។ ទីភ្នាក់ងារអនុវត្តច្បាប់ជាតិ បានបញ្ជាក់ពីការស្លាប់របស់កីឡាករទាំង ២រូប ក្នុងសេចក្តីថ្លែងការណ៍ផ្ទាល់មាត់នៅថ្ងៃទី៣ ខែកក្កដានេះ។

សេចក្ដីថ្លែងការណ៍ដែលត្រូវបានរាយការណ៍ដោយប្រព័ន្ធផ្សព្វផ្សាយ BBC បានឲ្យដឹងថា៖ «ព័ត៌មានដែលយើងមានរហូតមកដល់ពេលនេះ គឺរថយន្តម៉ាក Lamborghini បានជួបគ្រោះថ្នាក់ចរាចរណ៍ ហើយបានរេចេញពីផ្លូវដោយសារតែផ្ទុះកង់ពេលកំពុងវ៉ាជែងរថយន្តផ្សេង»។

សេចក្ដីថ្លែងការណ៍បានបន្ថែមថា៖ «ហេតុការណ៍គ្រោះថ្នាក់ កើតឡើងនៅម៉ោង ០០:៣០នាទី ម៉ោងក្នុងស្រុក នៅទីក្រុង Cernadilla ក្នុងខេត្ត Zamora។ រថយន្តបានកើតមានអគ្គិភ័យ ហើយអ្នកជិះក្នុងនោះទាំង ២នាក់ បានបាត់បង់ជីវិត»។

គួរបញ្ជាក់ថា កីឡាករ Jota វ័យ ២៨ឆ្នាំ ទើបតែបានរៀបការជាមួយគូស្នេហ៍របស់ខ្លួន គឺលោកស្រី Rute Cardoso កាលពី ២សប្តាហ៍មុន។ ពួកគេមានកូន ៣នាក់។ នៅក្នុងការបង្ហោះរួមគ្នាលើបណ្ដាញសង្គម Instagram ពួកគេបានបង្ហោះរូបភាពជាច្រើននៃថ្ងៃដ៏ពិសេសរបស់ពួកគេ ដោយសរសេរចំណងជើងថា «ថ្ងៃទី២២ ខែមិថុនា ឆ្នាំ២០២៥ មែនហើយ រួមរស់ជាមួយគ្នាជារៀងរហូត»។ 

កីឡាករ Jota បានចូលរួមជាមួយក្រុម Liverpool ក្នុងឆ្នាំ២០២០ ក្នុងកិច្ចព្រមព្រៀងតម្លៃ ៤៤,៧លានអឺរ៉ូ ដោយចាកចេញពីក្រុម Wolverhampton Wanderers ហើយបានស៊ុតបញ្ចូលទី ៦៥គ្រាប់ ជាមួយនឹងការបង្ហាញខ្លួន ១៨២ដង សម្រាប់ក្រុមហង្សក្រហម៕