លោក Donald Trump និងលោក Volodymyr Zelenskyy ត្រូវបានគេរំពឹងថា នឹងពិភាក្សាគ្នា អំពីការបញ្ឈប់ភ្លាមៗនូវការបញ្ជូនអាវុធសំខាន់ៗមួយចំនួនរបស់សហរដ្ឋអាមេរិកទៅកាន់ទីក្រុងគីវ ក្នុងអំឡុងពេលសន្ទនាតាមទូរសព្ទ នៅថ្ងៃសុក្រ (ទី៤ ខែកក្កដា)។ នេះបើយោងតាមការឲ្យដឹងពីបុគ្គលដឹងពីផែនការនេះ ដែលបាននិយាយថា ប្រធានាធិបតីអ៊ុយក្រែន ក៏នឹងលើកឡើងផងដែរនូវលទ្ធភាពនៃការលក់អាវុធ នាពេលអនាគត។

គួរបញ្ជាក់ថា អ៊ុយក្រែនបានកោះអញ្ជើញការទូតជាន់ខ្ពស់អាមេរិកម្នាក់ កាលពីថ្ងៃពុធ បន្ទាប់ពីខ្លួនបានភ្ញាក់ផ្អើលនឹងការសម្រេចរបស់មន្ទីរបញ្ចកោណ ក្នុងការបញ្ឈប់ផ្តល់ប្រព័ន្ធសព្វាវុធទំនើបៗជាច្រើន។ លោក Zelenskyy បាននិងកំពុងបញ្ចុះបញ្ចូលឲ្យមានការគាំទ្រ ដើម្បីទិញប្រព័ន្ធការពារ Patriot របស់អាមេរិក ក្នុងនោះរួមទាំងអំឡុងពេលចូលរួមកិច្ចប្រជុំកំពូលអង្គការណាតូ (NATO) កាលពីសប្តាហ៍មុន ដែលលោក Trump បានពណ៌នាថា ជាព្រឹត្តិការណ៍ «ល្អណាស់»។

អ៊ុយក្រែនមានការភ្ញាក់ផ្អើល ចំពោះការផ្អាកបញ្ជូនអាវុធ ក្នុងនោះរួមទាំងអាវុធមួយចំនួនដែលឥឡូវនេះស្ថិតនៅក្នុងប្រទេសប៉ូឡូញ ខណៈដែលរុស្ស៊ីបង្កើនការវាយលុកនៅរដូវក្តៅ ដែលមានពាក់ព័ន្ធនឹងការវាយប្រហារតាមអាកាសដ៏ធំបំផុតនៃសង្គ្រាមនេះ កាលពីចុងសប្តាហ៍មុន។ លោក Zelenskyy បាននិយាយថា លោកចង់ទិញប្រព័ន្ធ Patriot ចំនួន ១០គ្រឿង ក្នុងតម្លៃ ១៥ពាន់លានដុល្លារ ដើម្បីការពារប្រឆាំងនឹងយានដ្រូន និងមីស៊ីលរបស់រុស្ស៊ី។

លោក Trump បានស្នើក្នុងអំឡុងពេលកិច្ចប្រជុំកំពូលរបស់ណាតូថា លោកនឹងពិចារណាលក់ឧបករណ៍ស្ទាក់ចាប់ Patriot ទៅទីក្រុងគីវ ប៉ុន្តែបាននិយាយថា ការផ្គត់ផ្គង់មានកម្រិតទាប។ អ្នកនាំពាក្យក្រសួងការពារជាតិលោក Sean Parnell បាននិយាយកាលពីថ្ងៃពុធថា ការផ្អាកការដឹកជញ្ជូន បានកើតឡើងបន្ទាប់ពីមាន «ការត្រួតពិនិត្យសមត្ថភាព» «ដើម្បីធានាបានថា ជំនួយយោធារបស់សហរដ្ឋអាមេរិកស្របតាមអាទិភាពការពារជាតិរបស់ប្រទេស»។

ដោយស្នើសុំមិនបញ្ចេញឈ្មោះ ដោយសារពួកគេមិនត្រូវបានអនុញ្ញាតឲ្យពិភាក្សាជាសាធារណៈនោះ បុគ្គលដែលដឹងពីកិច្ចការនេះ បាននិយាយថា ពេលវេលានៃការជួបគ្នា អាចប្រែប្រួល ។ សេតវិមាន និងប្រធានាធិបតីអ៊ុយក្រែន មិនបានឆ្លើយតបទៅនឹងសំណើសុំការអត្ថាធិប្បាយនោះឡើយ ពាក់ព័ន្ធនឹងការសន្ទនាដែលបានគ្រោងទុកនេះ៕