ទីភ្នាក់ងារព័ត៌មានរដ្ឋ Anadolu រាយការណ៍នៅថ្ងៃព្រហស្បតិ៍នេះថា ភ្លើងឆេះព្រៃបានសម្លាប់បុរសសម្នាក់ដែលកំពុងដេកនៅក្នុងផ្ទះម្នាក់ឯង នៅខេត្តភាគខាងលិច Izmir ប្រទេសទួរគី ក្រោយវារីករាលដាលដល់តំបន់រស់នៅរបស់អ្នកស្រុក ដែលជាករណីស្លាប់មនុស្សលើកដំបូង ក្រោយភ្លើងឆេះព្រៃអស់រយៈពេលជិត ១សប្តាហ៍ ។

បុរសវ័យ ៨១ឆ្នាំម្នាក់ បានស្លាប់នៅសង្កាត់ Odemis ជាទីដែលក្រុមភ្នាក់ងារពន្លត់អគ្គិភ័យព្យាយាមពន្លត់អណ្តាតភ្លើងរយៈពេល ២ថ្ងៃជាប់ៗគ្នា ក្នុងនោះឧទ្ធម្ភាគចក្រជាច្រើនគ្រឿង និងយន្តហោះពន្លត់អគ្គិភ័យផ្សេងទៀត បានទម្លាក់ទឹកលើតំបន់ភ្នំជាច្រើនដែលគ្របដណ្តប់ដោយផ្សែងដ៏ក្រាស់ឃ្មឹក ។

ទីភ្នាក់ងារព័ត៌មាន Anadolu រាយការណ៍ថា ក្រុមអាជ្ញាធរបានបិទផ្លូវមួយចំនួនចូលទៅកាន់ទីក្រុងទេសចរណ៍ Cesme ស្ថិតក្នុងសមុទ្រ Aegean ។ 

ដោយឡែក មនុស្សប្រហែល ៥ម៉ឺននាក់ ត្រូវបានជម្លៀសខ្លួនបណ្តោះអាសន្នកាលពីដើមសប្តាហ៍នេះ ស្របពេលភ្លើងឆេះព្រៃកាន់តែធ្ងន់ធ្ងរឡើង ដោយសារសីតុណ្ហភាពខ្ពស់ សំណើមទាប និងខ្យល់បក់ខ្លាំង ។ ភ្លើងឆេះព្រៃមួយចំនួន ត្រូវបានទប់ស្កាត់ជាប់ ។

ទោះបីជាយ៉ាងណាក៏ដោយ ភ្លើងឆេះព្រៃផ្សេងទៀត បានឆាបឆេះផងដែរនៅថ្ងៃព្រហស្បតិ៍នេះ នៅខេត្តទេសចរណ៍ភាគខាងត្បូង Antalya និងតំបន់ក្រៅទីក្រុងអ៊ីស្តង់ប៊ុល ៕