អ្នកនាំពាក្យក្រសួងការបរទេសចិន កាលពីថ្ងៃព្រហស្បតិ៍សប្ដាហ៍នេះ បានជំរុញឱ្យសហរដ្ឋអាមេរិក បញ្ឈប់ការជំរុញនូវអ្វីដែលហៅថា ទង្វើដែលទាក់ទងនឹងកោះតៃវ៉ាន់។

អ្នកនាំពាក្យលោកស្រី Mao Ning បានថ្លែងក្នុងសន្និសីទសារព័ត៌មានប្រចាំថ្ងៃ នៅពេលដែលត្រូវបានស្នើសុំឱ្យធ្វើអត្ថាធិប្បាយលើការអនុម័តនូវអ្វីដែលគេហៅថា "ច្បាប់មិនរើសអើងកោះតៃវ៉ាន់" ដោយសភាតំណាងសហរដ្ឋអាមេរិក ដែលតម្រូវឱ្យរដ្ឋាភិបាលសហរដ្ឋអាមេរិកគាំទ្រតំបន់តៃវ៉ាន់របស់ប្រទេសចិន ក្នុងការចូលរួមជាមួយមូលនិធិរូបិយវត្ថុអន្តរជាតិ IMF ។

លោកស្រីបានរំលឹកឡើងវិញថា មានតែចិនតែមួយនៅលើពិភពលោក តៃវ៉ាន់គឺជាផ្នែកដែលមិនអាចកាត់ផ្តាច់បាននៃទឹកដីរបស់ប្រទេសចិន ហើយរដ្ឋាភិបាលនៃសាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់ដែលតំណាងឱ្យប្រទេសចិនទាំងមូល។

លោកស្រីបាននិយាយថា កោះតៃវ៉ាន់មិនមានមូលដ្ឋាន ហេតុផល ឬសិទ្ធិក្នុងការចូលរួមជាមួយអង្គការសហប្រជាជាតិ ឬអង្គការអន្តរជាតិណាមួយផ្សេងទៀត ដែលសមាជិកភាពរបស់ពួកគេត្រូវបានបង្ខាំងនៅក្នុងរដ្ឋអធិបតេយ្យ។

អ្នកនាំពាក្យរូបនេះក៏បានជំរុញឲ្យសហរដ្ឋអាមេរិកគោរពតាមគោលការណ៍ចិនតែមួយ និងសេចក្តីថ្លែងការណ៍រួមទាំងបីរបស់ចិន-អាមេរិក គោរពច្បាប់អន្តរជាតិ និងបទដ្ឋានជាមូលដ្ឋាននៃទំនាក់ទំនងអន្តរជាតិ បញ្ឈប់ការជំរុញសកម្មភាពនានា ឈប់ប្រើបញ្ហាកោះតៃវ៉ាន់ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសចិន និងបញ្ឈប់ការបញ្ជូនសញ្ញាខុសទៅកាន់កងកម្លាំងផ្តាច់ខ្លួនសម្រាប់ឯករាជ្យភាពតំបន់តៃវ៉ាន់តទៅទៀត៕