ប្រធានាធិបតីអាមេរិក លោក Donald Trump បាននិយាយនៅក្នុងថ្ងៃសុក្រ (០៤ កក្កដា) នេះថា ពិភពលោកប្រហែលជាអាចដឹងក្នុងរយៈពេល ២៤ម៉ោងបន្ទាប់ ថាតើក្រុមសកម្មប្រយុទ្ធប៉ាឡេស្ទីន ហាម៉ាស យល់ព្រមទទួលយកនូវអ្វីដែលលោកបានហៅថាជា "សំណើចុងក្រោយ" សម្រាប់បទឈប់បាញ់អ៊ីស្រាអែល-ហាម៉ាស នៅតំបន់ហ្កាហ្សាដែរឬយ៉ាងណា។

លោកប្រធានាធិបតីរូបនេះក៏បាននិយាយផងដែរថា លោកបានពិភាក្សាជាមួយអារ៉ាប៊ីសាអ៊ូឌីត អំពីការពង្រីកកិច្ចព្រមព្រៀងអាប្រាហាម ដែលជាកិច្ចព្រមព្រៀងស្តីពីការធ្វើប្រក្រតីភាពនៃទំនាក់ទំនង ដែលរដ្ឋបាលរបស់លោកបានចរចាជាយូរមកហើយរវាងអ៊ីស្រាអែល និងបណ្ដាប្រទេសឈូងសមុទ្រមួយចំនួន ក្នុងអំឡុងពេលអាណត្តិដំបូងរបស់លោក។

លោក Trump បាននិយាយកាលពីថ្ងៃអង្គារសប្ដាហ៍នេះថា អ៊ីស្រាអែលបានទទួលយកលក្ខខណ្ឌដែលត្រូវការដើម្បីសម្រេចបទឈប់បាញ់រយៈពេល ៦០ថ្ងៃជាមួយក្រុមហាម៉ាសរួចហើយ ដោយអំឡុងពេលនោះ ភាគីនានានឹងធ្វើការបន្តដើម្បីបញ្ចប់សង្រ្គាម។ នៅពេលត្រូវសាកសួរនៅថ្ងៃសុក្រនេះថាតើក្រុមហាម៉ាស យល់ព្រមលើក្របខណ្ឌកិច្ចព្រមព្រៀងបទឈប់បាញ់ចុងក្រោយឬក៏អត់ លោក Trump ឆ្លើយថា "គ្រប់គ្នាកំពុងរង់ចាំមើល ហើយនឹងអាចដឹងក្នុងពេល ២៤ម៉ោងខាងមុខ"។

ប្រភពស្និទ្ធនឹងក្រុមហាម៉ាស បាននិយាយកាលពីថ្ងៃព្រហស្បតិ៍ថា ក្រុមអ៊ីស្លាមនិយមមួយនេះចង់បានការធានាថា សំណើបទឈប់បាញ់ថ្មីដែលគាំទ្រដោយសហរដ្ឋអាមេរិកនោះ នឹងនាំទៅដល់ការបញ្ចប់សង្គ្រាមរបស់អ៊ីស្រាអែល នៅដែនដីហ្កាហ្សា ជាអចិន្រ្តៃយ៍៕