កម្ដៅដ៏ក្តៅគគុកបានគ្របដណ្ដប់លើឆ្នេរសមុទ្រភាគខាងកើតរបស់ប្រទេសចិន នៅថ្ងៃសុក្រ (០៤ កក្កដា) នេះ ខណៈប្រព័ន្ធសម្ពាធខ្ពស់បានវាយលុកតំបន់ ដែលមានប្រជាជនច្រើនបំផុតរបស់ប្រទេស ដោយគំរាមកំហែងមជ្ឈមណ្ឌលកសិកម្ម និងផលិតកម្មសំខាន់ៗ និងបង្កើនការភ័យខ្លាចចំពោះលទ្ធភាពនៃការខាតបង់ផ្នែកសេដ្ឋកិច្ច ស្របពេលផ្នែកផ្សេងទៀតកំពុងទទួលរងជំនន់ទឹកភ្លៀងយ៉ាងខ្លាំងក្លា។

តំបន់សេដ្ឋកិច្ចដ៏ធំទូលាយរបស់ចិន ត្រូវបានកំណត់ថានឹងស៊ូទ្រាំក្រោមសីតុណ្ហភាពពី ៣៧ ទៅ ៣៩អង្សាសេ ក្នុងសប្តាហ៍ខាងមុខ។ អ្នកព្យាករកំពុងព្រមានថា ផ្នែកខ្លះនៃខេត្ត Anhui និង Zhejiang ក៏ដូចជាខេត្តភាគកណ្តាល Hubei និង Henan អាចឡើងកម្ដៅដល់ទៅ ៤០អង្សាសេ។

ខណៈភាគខាងកើតកំពុងក្ដៅគគុក មជ្ឈមណ្ឌលឧតុនិយមជាតិបានព្យាករថា នឹងមានភ្លៀងធ្លាក់កាន់តែខ្លាំងឡើងនៅទូទាំងផ្នែកភាគខាងជើង និងភាគនិរតីរបស់ចិន នៅថ្ងៃសុក្រនេះ និងថ្ងៃសៅរ៍ស្អែក ជាមួយនឹងវីដេអូជាច្រើនផ្សព្វផ្សាយលើបណ្តាញសង្គមរបស់ចិន បង្ហាញអ្នកស្រុកជិះទូកកាណូតកាត់តាមដងផ្លូវលិចទឹកក្នុងទីក្រុង Chengdu។

លោក Chen Min អនុរដ្ឋមន្ត្រីក្រសួងធនធានទឹកបាននិយាយថា ដោយសារភ្លៀងធ្លាក់ជាបន្តបន្ទាប់ប៉ះពាល់ដល់តំបន់ដ៏ធំទូលាយនៅទូទាំងប្រទេសចិន ទន្លេជាង ៣០០កន្លែង បានរាយការណ៍ពីកម្រិតទឹកឡើងលើសពីកម្រិតប្រកាសអាសន្នសម្រាប់ការគ្រប់គ្រងទឹកជំនន់ គិតត្រឹមម៉ោងក្នុងស្រុក ៨ព្រឹកថ្ងៃសុក្រនេះ៕