ក្រុមគ្រួសារបានរសាត់តាមកម្ទេចកម្ទីនៃទឹកជំនន់ កាលពីថ្ងៃអាទិត្យ ហើយទឹកជំនន់ដ៏គំហុកក៏បានជន់លិចកន្លែងបោះជំរំ Camp Mystic ដែលជាជំរំរដូវក្តៅរបស់ក្មេងស្រីៗទាំងអស់ផងដែរ និងលំនៅឋានជាច្រើនត្រូវបានបំផ្លិចបំផ្លាញដោយទឹកជំនន់ដ៏ធ្ងន់ធ្ងរ ស្របពេលអ្នកស្លាប់បានកើនឡើងដល់៨២នាក់ នៅភាគកណ្តាលរដ្ឋតិចសាស់ សហរដ្ឋអាមេរិក។

ក្រុមអ្នកជួយសង្គ្រោះដែលកំពុងប្រឹងប្រែងដ៏លំបាក ប្រឈមនឹងអាកាសធាតុអាប់អួរ និងសត្វពស់ បានបន្តការស្វែងរកទាំងអស់សង្ឃឹម សម្រាប់អ្នកបាត់ខ្លួន រួមទាំងក្មេងស្រី ១០ នាក់ និងអ្នកប្រឹក្សាម្នាក់មកពីជំរំនោះ។ ជាលើកដំបូងចាប់តាំងពីព្យុះបានចាប់ផ្តើមវាយលុករដ្ឋតិចសាស់ អភិបាលរដ្ឋ លោក Greg Abbott បាននិយាយថា មានមនុស្សចំនួន៤១ នាក់ដែលត្រូវបានបញ្ជាក់ថាបាត់ខ្លួនទូទាំងរដ្ឋ ហើយមនុស្សជាច្រើនទៀតអាចបាត់ខ្លួន។  

លោក Larry Leitha បាននិយាយកាលពីរសៀលថ្ងៃអាទិត្យថា នៅតំបន់ Kerr County ដែលជាទីតាំងនៃការបោះជំរំ Camp Mystic និងជំរំយុវជនផ្សេងទៀតក្នុងតំបន់ Texas Hill ក្រុមអ្នករុករកបានរកឃើញសាកសពមនុស្សចំនួន ៦៨ នាក់ រួមទាំងកុមារចំនួន ២៨ នាក់ផងដែរ។



លោកបានសន្យាថានឹងបន្តស្វែងរករហូតដល់ មនុស្សគ្រប់គ្នាត្រូវបានរកឃើញ ពីទឹកជំនន់ដ៏គំហុកនេះកាលពីថ្ងៃសុក្រ។ យោងតាមមន្ត្រីក្នុងតំបន់បានឱ្យដឹងថា ការស្លាប់ចំនួន១០នាក់ផ្សេងទៀតត្រូវបានគេរាយការណ៍នៅក្នុងស្រុក Travis, Burnet, Kendall, Tom Green និងស្រុក Williamson ។

លោក Freeman Martin មកពីនាយកដ្ឋានសុវត្ថិភាពសាធារណៈរដ្ឋតិចសាស់ បាននិយាយថា ចំនួនអ្នកស្លាប់គឺប្រាកដណាស់ថានឹងកើនឡើងក្នុងរយៈពេលប៉ុន្មានថ្ងៃខាងមុខនេះ៕