មេដឹកនាំក្រុមប្រទេសប៊្រិក(BRICS) នៅក្នុងកិច្ចប្រជុំកំពូលកាលពីថ្ងៃអាទិត្យ ទី៦ កក្កដា បានផ្តោតសំខាន់គោលដៅលើការដំឡើងពន្ធនាំចូល «មិនរើសមុខ» របស់ប្រធានាធិបតីសហរដ្ឋអាមេរិក លោក Donald Trump និងការវាយប្រហារកាលពីពេលថ្មីៗនេះរបស់អ៊ីស្រាអែលនិងអាមេរិកទៅលើប្រទេសអ៊ីរ៉ង់។

ប្លុកនេះត្រូវបានបែងចែកច្រើន ប៉ុន្តែបានរកឃើញមូលហេតុរួម នៅពេលនិយាយអំពីមេដឹកនាំសហរដ្ឋអាមេរិក និងសង្គ្រាមដំឡើងពន្ធដែលចាប់ផ្តើមហើយឈប់របស់លោកTrump ទោះបីជាពួកគេបានបញ្ចៀសការហៅឈ្មោះលោកដោយផ្ទាល់ក៏ដោយ។ សមាជិកក្រុមប្រទេស BRICS បាននិយាយថា ការដំឡើងពន្ធ បានមានហានិភ័យដល់ផលប៉ះពាល់សេដ្ឋកិច្ចពិភពលោក នេះបើយោងតាមសេចក្តីថ្លែងការណ៍រួមរបស់កិច្ចប្រជុំកំពូល។

ជាមួយគ្នានេះសមាជិកក្រុមប្រទេសនេះ ក៏បានផ្តល់ការគាំទ្រដល់ប្រទេសអ៊ីរ៉ង់ ដោយថ្កោលទោសការវាយប្រហារដោយយោធាជាបន្តបន្ទាប់លើរោងចក្រនុយក្លេអ៊ែរ និងគោលដៅផ្សេងៗទៀត ដែលធ្វើឡើងដោយអ៊ីស្រាអែល និងសហរដ្ឋអាមេរិក។

បច្ចុប្បន្ននេះ លោក Trump បានព្រមានថា លោកនឹងដាក់ពន្ធឯកតោភាគីលើដៃគូនានា លុះត្រាតែពួកគេឈានដល់ «កិច្ចព្រមព្រៀង» នៅត្រឹមថ្ងៃទី១ ខែសីហា។ ក្នុងសម្បទានជាក់ស្តែងដល់សម្ព័ន្ធមិត្តរបស់សហរដ្ឋអាមេរិក ដូចជាប្រទេសប្រេស៊ីល ឥណ្ឌា និងអារ៉ាប៊ីសាអូឌីត សេចក្តីថ្លែងការណ៍របស់កិច្ចប្រជុំកំពូល ពុំបានរិះគន់សហរដ្ឋអាមេរិក ឬប្រធានាធិបតីរបស់ប្រទេសនេះដោយការហៅឈ្មោះនៅក្នុងចំណុចណាមួយនោះទេ។