គណៈវិនិច្ឆ័យសម្រាប់ការគោរពច្បាប់អន្តរជាតិ បានអំពាវនាវដល់ចៅក្រមរដ្ឋបាលឱ្យផ្អាកការដឹកជញ្ជូនយុទ្ធោបករណ៍សម្រាប់គោលដៅទៅឲ្យអ៊ីស្រាអែល។

ក្រុមមេធាវី និងគណៈវិនិច្ឆ័យបារាំងនិយាយថា ខ្លួន «បានដាក់សំណើបន្ទាន់មួយទៅកាន់តុលាការរដ្ឋបាលក្រុងម៉ុងត្រី(Montreuil) ប្រទេសបារាំង» ដើម្បីផ្អាកការដឹកជញ្ជូនយុទ្ធោបករណ៍ឆ្លងកាត់អាកាសយានដ្ឋាន Roissy-Charles de Gaulle របស់ប្រទេសបារាំងទៅកាន់ក្រុមហ៊ុន Elbit Systems ក្នុងប្រទេសអ៊ីស្រាអែល ពីក្រុមហ៊ុនស៊ុយអែត Swebor Stal Svenska AB ។

ក្រុមនេះបាននិយាយនៅក្នុងសេចក្តីថ្លែងការណ៍មួយដែលបានចែករំលែកនៅលើបណ្តាញ X ថា Elbit Systems ដែលជាក្រុមហ៊ុនផ្គត់ផ្គង់សព្វាវុធធំមួយដល់កងទ័ពអ៊ីស្រាអែល មានតួនាទីសំខាន់ក្នុងកិច្ចខិតខំប្រឹងប្រែងសង្រ្គាមនាពេលបច្ចុប្បន្ន រួមទាំងនៅក្នុងតំបន់ហ្កាហ្សា។

គណៈវិនិច្ឆ័យសម្រាប់ការគោរពច្បាប់អន្តរជាតិ និយាយថា ខ្លួនមានបំណងព្រមានដល់អាជ្ញាធរបារាំងចំពោះ «ភាពស្មុគស្មាញដែលអាចកើតមាន» នៅក្នុងឧក្រិដ្ឋកម្មអន្តរជាតិ ដោយបាននិយាយថា «មិនស្របគ្នាទៅនឹងតម្លៃរបស់ប្រជាជនបារាំង»។