យោងតាមសារព័ត៌មាន BILD និងគណនីរបស់ស្ថាប័នជំនួយអាល្លឺម៉ង់ សម្រាប់អ៊ុយក្រែន (GAU) ដែលតាមដានជំនួយយោធារបស់ទីក្រុងប៊ែរឡាំងផ្ដល់ឲ្យទីក្រុងគីវ បានឲ្យដឹងថា ប្រទេសអ៊ុយក្រែនបានផ្ញើឲ្យអាល្លឺម៉ង់នូវសំណើដ៏ធំមួយ ដើម្បីស្នើសុំជំនួយយោធា ដោយក្នុងបញ្ជីនោះ រួមមានប្រព័ន្ធការពារដែនអាកាស គ្រាប់រំសេវ រថពាសដែក រថពាសដែកវិស្វកម្ម និងគ្រឿងយុទ្ធោបករាណ៍ផ្សេងទៀតដែលកងកម្លាំងប្រដាប់អាវុធអ៊ុយក្រែនត្រូវការ។

យោងតាមសារព័ត៌មាន BILD បានឲ្យដឹងថា អ៊ុយក្រែនបានបញ្ជូនបញ្ជីស្នើសុំអាវុធ គ្រាប់រំសេវ និងគ្រឿងយុទ្ធោបករណ៍ផ្សេងទៀតទៅរដ្ឋាភិបាលអាល្លឺម៉ង់។ សារព័ត៌មាននេះបញ្ជាក់ថា ទាំងប្រភពយោធា និងនយោបាយ បានអះអាងថា ពិតជាមានបញ្ជីនេះមែន។

តែយ៉ាងក្ដី អាល្លឺម៉ង់មិនបានទទួលស្គាល់ជាផ្លូវការនូវឯកសារនេះ ដែលត្រូវបានគេរាយការណ៍ថា មានតម្លៃរាប់ពាន់លានអឺរ៉ូ។ រដ្ឋាភិបាលបានលើកឡើងពីក្ដីបារម្ភផ្នែកសន្តិសុខជាហេតុផល សម្រាប់ការលាក់ទុកព័ត៌មានលម្អិតដ៏រសើបបែបនេះ។ អ្នកនាំពាក្យក្រសួងការពារជាតិអាល្លឺម៉ង់ បានប្រាប់សារព័ត៌មាន BILD ថា៖ «ឈរលើហេតុផលសន្តិសុខយោធា និងដោយមានគោលនយោបាយបាយទំនាក់ទំនងថ្មីរបស់រដ្ឋាភិបាលសហព័ន្ធ ស្តីពីការគាំទ្រអ៊ុយក្រែន យើងសូមមិនឆ្លើយសំណួរ អំពីការផ្ដល់ជំនួយគាំទ្រដោយផ្ទាល់នោះទេ»។

ជាមួយគ្នានេះ របាយការណ៍បន្ថែមថា៖ «ថវិកាជំនួយយោធាឆ្នាំ២០២៥ សម្រាប់អ៊ុយក្រែន ត្រូវបានបង្កើន ១,២ពាន់លានអឺរ៉ូ ធៀបនឹងឆ្នាំមុន ដោយកើនឡើងពីកម្រិត ៧,១ពាន់លានអឺរ៉ូ ដល់ ៨,៣ពាន់លានអឺរ៉ូ។ ចំនួននេះអាចផ្តល់ឲ្យរដ្ឋមន្ត្រីការពារជាតិ លោក Boris Pistorius មាននូវភាពបត់បែនផ្នែកហិរញ្ញវត្ថុ ដើម្បីបំពេញតាមសំណើមួយចំនួនរបស់អ៊ុយក្រែន»។

ហើយទន្ទឹមនឹងនេះដែរ GAU កត់សម្គាល់ថា ផ្នែកការពារដែនអាកាសក្នុងសំណើនោះ ត្រូវបានដោះស្រាយរួចហើយ។ កាលពីចុងខែឧសភា អ៊ុយក្រែនបានចុះហត្ថលេខាលើកិច្ចសន្យាជាមួយអាល្លឺម៉ង់ សម្រាប់ការចែកចាយប្រព័ន្ធ IRIS-T SLM ចំនួន ៤គ្រឿង ក្រោមកញ្ចប់ជំនួយ ៥ពាន់លានអឺរ៉ូ៕