ប្រទេសចិន នៅថ្ងៃចន្ទ (ទី៧ ខែកក្កដា) បាននិយាយថា ប្រទេសសមាជិក BRICS ជាក្រុមដែលរួមមានប្រេស៊ីល រុស្ស៊ី និងឥណ្ឌា មិនបានស្វែងរក «ការប្រឈមមុខដាក់គ្នា» នោះឡើយ បន្ទាប់ពីប្រធានាធិបតីអាមេរិក លោក Donald Trump បានប្តេជ្ញាថា នឹងដាក់ពន្ធបន្ថែម ១០ភាគរយលើប្រទេសដែលស្របតាមប្លុកនេះ។

អ្នកនាំពាក្យក្រសួងការបរទេសចិន លោកស្រី Mao Ning បានប្រាប់ឲ្យដឹងថា៖ «ទាក់ទងនឹងការដាក់ពន្ធគយនេះ ប្រទេសចិនបានបញ្ជាក់ជំហររបស់ខ្លួនម្តងហើយម្តងទៀតថា សង្រ្គាមពាណិជ្ជកម្ម និងពន្ធមិនមានអ្នកណាទទួលបានជ័យជម្នះនោះទេ ហើយវិធានការគាំពារនិយមមិននាំឆ្ពោះទៅរកដំណើស្រាយនោះទេ»។

គួរបញ្ជាក់ថា លោក Trump បាននិយាយថា លោកនឹងផ្ញើលិខិតពន្ធគយដំបូងទៅកាន់ប្រទេសនានា នៅថ្ងៃចន្ទនេះ ពោលគឺប៉ុន្មានថ្ងៃមុនថ្ងៃផុតកំណត់ ដែលលោកបានដាក់សម្រាប់ដៃគូពាណិជ្ជកម្ម ដើម្បីឲ្យឈានដល់កិច្ចព្រមព្រៀង។

កាលពីថ្ងៃអាទិត្យ លោកបានប្រាប់ថា លោកនឹងផ្ញើសំណុំលិខិតក្រុមដំបូងរហូតដល់ ១៥ច្បាប់ ដែលព្រមានថា ការយកពន្ធរបស់សហរដ្ឋអាមេរិកលើការនាំចូល នឹងត្រលប់ទៅកម្រិតខ្ពស់ដែលលោកបានកំណត់ក្នុងខែមេសា ប្រសិនបើប្រទេសនានាមិនធ្វើកិច្ចព្រមព្រៀង។

ហើយតាមរយៈការបង្ហោះនៅលើបណ្តាញសង្គម Truth Social របស់លោក លោក Trump បានគំរាមយកពន្ធ ១០ភាគរយបន្ថែមទៀតលើប្រទេសដែលស្របជាមួយនឹងក្រុមប្រទេសកំពុងរីកចម្រើនរបស់ BRICS ដោយចោទប្រកាន់ប្រទេសទាំងនោះថា បាន «ប្រឆាំងអាមេរិក» បន្ទាប់ពីពួកគេបានថ្កោលទោសវិធានការពន្ធរបស់លោក ក្នុងកិច្ចប្រជុំកំពូល នៅទីក្រុង Rio de Janeiro ប្រទេសប្រេស៊ីល កាលពីថ្ងៃអាទិត្យ។

តែនៅថ្ងៃចន្ទនេះ ទីក្រុងប៉េកាំង បាននិយាយការពារក្រុមនេះថា ប្លុក BRICS គឺជា «វេទិកាដ៏សំខាន់ សម្រាប់កិច្ចសហប្រតិបត្តិការ រវាងទីផ្សារដែលកំពុងរីកចម្រើន និងប្រទេសកំពុងអភិវឌ្ឍន៍»។ លោកស្រី Mao បានបញ្ជាក់ថា៖ «នេះគឺជាប្លុកតស៊ូមតិ ដើម្បីគាំទ្រការបើកចំហ បរិយាបន្ន និងកិច្ចសហប្រតិបត្តិការឈ្នះ-ឈ្នះ។ នេះមិនមែនជាក្រុមប្រទេសពាក់ព័ន្ធនឹងការប្រឈមមុខដាក់គ្នានោះទេ ហើយមិនបានកំណត់គោលដៅលើប្រទេសណាមួយឡើយ»៕