នៅមណ្ឌលសុខភាពមួយកន្លែងស្ថិតក្នុងទីក្រុង Baidoa ប្រទេសសូម៉ាលី គ្រូពេទ្យបានផ្តល់ដំណក់វ៉ាក់សាំងដល់កុមារកំពុងយំ ខណៈដែលម្តាយកំពុងលួងកូនរបស់គាត់ ។ ទិដ្ឋភាពនេះឆ្លុះបញ្ចាំងការពិតប្រចាំថ្ងៃនៅសូម៉ាលី ជាទីដែលអត្រាផ្តល់វ៉ាក់សាំងនៅទាប ហើយនិងកង្វះអាហារូបត្ថម្ភ មានលក្ខណៈសកល ។

អ្នកស្រី Sahro Ali ស្រ្តីជាម្តាយមានកូន ២នាក់ បានធ្វើការសង្កត់ធ្ងន់ពីសារៈសំខាន់ធ្ងន់ធ្ងរនៃការផ្តល់វ៉ាក់សាំង និងការទទួលបានឱសថព្យាបាលសម្រាប់កូនៗរបស់គាត់ ។

អ្នកស្រីនិយាយថា ពួកយើងត្រូវការវ៉ាក់សាំង និងឱសថព្យាបាលកូនរបស់គាត់ ។ ក្មេងៗនឹងទទួលរងបញ្ហាគ្រប់បែបយ៉ាង បើសិនជាពួកគេពុំទទួលបានវ៉ាក់សាំងបង្ការជំងឺទេនោះ ។ បើសិនជាខកខានប្រព័ន្ធភាពស៊ាំ ក្មេងៗនឹងជួបកង្វះអាហារូបត្ថម្ភ ហើយពួកគេនឹងត្រូវស្លាប់ ។

នៅមណ្ឌលសុខភាព Bullo-Jadid ដែលគាំទ្រដោយទីភ្នាក់ងារ USAID និងទីភ្នាក់ងារសង្រ្គោះកុមារ លោកវេជ្ជបណ្ឌិត Maryan Mohamed និយាយថា មណ្ឌលសុខភាពរបស់លោកទទួលក្មេងៗប្រហែល ៦០នាក់ ជារៀងរាល់ថ្ងៃ ដែលភាគច្រើននៃពួកគេ ស្វែងរកវ៉ាក់សាំង ។

លោកបន្តថា ក្មេងៗដែលត្រូវការវ៉ាក់សាំង មកពីជំរំជនភៀសខ្លួន និងតំបន់ដាច់ស្រយាល ។ ពេលដែលខ្វះខាតវ៉ាក់សាំង ពួកយើងមានការព្រួយបារម្ភថា ជំងឺ នឹងរីករាលដាល ហើយនិងកើនឡើង ដែលជំងឺទាំងអស់នោះ រួមទាំងក្អកមាន់ និងជំងឺស្វិតដៃជើង ។

ទោះបីជាយ៉ាងណាក៏ដោ ការកាត់ផ្តាច់ជំនួយរបស់ USAID បានធ្វើឲ្យវិបត្តិមួយនេះ កាន់តែធ្ងន់ធ្ងរខ្លាំង ។ លោក Moazzam Malik គឺជាប្រធានប្រតិបត្តិទីភ្នាក់ងារសង្រ្គោះកុមារដែលមានមូលដ្ឋាននៅចក្រភពអង់គ្លេស និយាយថា តម្រូវការនៅប្រទេសសូម៉ាលី មានទំហំធំធេងខ្លាំងណាស់ ដោយសារសហគមន៍ជាច្រើនងាយរងគ្រោះខ្លាំង បន្ទាប់ពីគ្រោះរាំងស្ងួតរយៈពេលយូរ និងការងាប់របស់បសុសត្វ ។

លោក Malik បន្តថា ក្នុងពេលតែមួយ ពួកគេប្រឈមនឹងតម្រូវការខ្លាំង ដោយសារគ្រោះរាំងស្ងួត និងផលប៉ះពាល់បង្កឡើងដោយសារបម្រែបម្រួលអាកាសធាតុ ហើយនិងផលប៉ះពាល់ដោយសារការកាត់ផ្តាច់ជំនួយ ៕