ប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សចំនួន ៣២នាក់ បានឡើងសវនាការនៅប្រទេសទួរគី នាថ្ងៃចន្ទ (ទី៧ ខែកក្កដា) នេះ ពាក់ព័ន្ធនឹងអគ្គិភ័យឆាបឆេះសណ្ឋាគាររមណីយដ្ឋានជិះស្គីដ៏ប្រណីតមួយ កាលពីខែមករា ជាហេតុការណ៍ដែលបានសម្លាប់មនុស្ស ៧៨នាក់ ក្នុងនោះមានកុមារ ៣៦នាក់ផងដែរ។

គ្រួសារទាំងមូលបានបាត់បង់ជីវិត នៅពេលដែលអណ្ដាតភ្លើងយ៉ាងសន្ធោសន្ធៅ បានឆាបឆេះសណ្ឋាគារ Grand Kartal នៅរមណីយដ្ឋានភ្នំភាគខាងជើងនៃទីក្រុង Kartalkaya នាព្រឹកព្រលឹមថ្ងៃទី២១ ខែមករា។ សំណួរបានមានកាន់តែច្រើនឡើង អំពីវិធានការសុវត្ថិភាពអគ្គិភ័យ នៅសណ្ឋាគារ ហើយក្រុមគ្រួសារជនរងគ្រោះ បានចោទប្រកាន់ថា ការធ្វេសប្រហែសបានរួមចំណែកធ្វើឲ្យចំនួនអ្នកស្លាប់កើនឡើងខ្ពស់។ មនុស្សជាង ១៣០នាក់ បានរងរបួស ហើយអគារ ១២ជាន់ ត្រូវបានឆេះបំផ្លាញ។

ជនជាប់ចោទចំនួន ១៣នាក់ ក្នុងនោះមានរួមទាំងមន្ត្រីជាន់ខ្ពស់នៅសណ្ឋាគារផងដែរ នាយកដ្ឋានពន្លត់អគ្គីភ័យ និងក្រុមប្រឹក្សាក្រុង ប្រឈមនឹងការជាប់ពន្ធនាគាររហូតដល់ ១៩៩៨ឆ្នាំ ក្នុងម្នាក់ៗ ពាក់ព័ន្ធនឹងបទចោទប្រកាន់ចំនួន ៧៨ករណី ក្នុងនោះរួមមានទាំងលទ្ធភាពនៃ «ឃាតកម្មដោយចេតនា» ដែលមានគោលបំណងសម្លាប់។

អ្នករួចជីវិតពីហេតុការណ៍នេះ និងអ្នកជំនាញ បាននិយាយថា ប្រព័ន្ធផ្ដល់សញ្ញាអាសន្នរបស់សណ្ឋាគារមិនដំណើរការឡើយ។ ហើយយោងតាមការចោទប្រកាន់ផ្លូវការ បានបង្ហាញថា ជនសង្ស័យដែលប្រឈមនឹងបទឃាតកម្ម រួមមានម្ចាស់សណ្ឋាគារ អ្នកគ្រប់គ្រង និងសមាជិកក្រុមប្រឹក្សាអភិបាលរងក្រុង Bolu និងមន្ត្រីពន្លត់អគ្គិភ័យ ២នាក់៕