បណ្តាប្រទេសនៅទូទាំងសមុទ្រមេឌីទែរ៉ាណេដ៏ធំល្វឹងល្វើយ កំពុងទប់ទល់នឹងចំហេះព្រៃដែលរីករាលដាលយ៉ាងឆាប់រហ័ស និងសីតុណ្ហភាពកើនឡើងដ៏គ្រោះថ្នាក់ ខណៈរលកកម្ដៅបន្តវាយប្រហារពាសពេញអឺរ៉ុបខាងត្បូង និងផ្នែកខ្លះនៃមជ្ឈិមបូព៌ា ដែលជំរុញឱ្យមានការជម្លៀស និងការជូនដំណឹងបន្ទាន់។

ចំហេះបានផ្ទុះឡើងនៅប្រទេសក្រិក ទួរគី បារាំង និងស៊ីរី កាលពីថ្ងៃអាទិត្យចុងសប្ដាហ៍មុន ជាមួយនឹងប្រទេសមួយចំនួនទៀតកំពុងប្រុងប្រយ័ត្នខ្ពស់ ខណៈអ្នកព្យាករព្រមានថា អាកាសធាតុក្តៅខ្លាំងនឹងកាន់តែអាក្រក់ទៅៗក្នុងប៉ុន្មានថ្ងៃខាងមុខ។

រាប់ចាប់ពីប្រទេសអេស្ប៉ាញ ដល់អ៊ីតាលី អាជ្ញាធរបានជំរុញអ្នកស្រុកឱ្យការពារជនងាយរងគ្រោះ និងជៀសវាងការធ្វើដំណើរមិនចាំបាច់ ក្នុងអំឡុងពេលរលកកម្ដៅធ្ងន់ធ្ងរដំបូងនៃរដូវក្តៅក្នុងតំបន់។ ក្រុមសង្គ្រោះបន្ទាន់ និងរថយន្តគិលានសង្គ្រោះត្រូវដាក់ដំណើរការនៅជិតគោលដៅទេសចរណ៍ដ៏ពេញនិយម ខណៈអ្នកឧតុនិយមព្រមានថា ព្រឹត្តិការណ៍កម្ដៅខ្លាំង - ជំរុញដោយបម្រែបម្រួលអាកាសធាតុ - កាន់តែញឹកញាប់ និងកាន់តែខ្លាំងក្លា។

នៅតំបន់ភាគខាងលិចទួរគី ចំហេះព្រៃផ្ទុះឡើងកាលថ្ងៃអាទិត្យកន្លងទៅ ក្នុងខេត្ត Izmir បង្កដោយខ្យល់បក់ខ្លាំង និងសម្លាប់មនុស្សជាច្រើន ហើយអ្នកពន្លត់អគ្គិភ័យ ដែលគាំទ្រដោយយន្តហោះ បានប្រឹងប្រែងគ្រប់គ្រងអណ្ដាតភ្លើង ស្របពេលដែលអាជ្ញាធរក្នុងតំបន់និយាយថា សង្កាត់ចំនួនប្រាំនៅក្នុងស្រុក Seferihisar ត្រូវជម្លៀសចេញដើម្បីសុវត្ថិភាព៕