ប្រទេសចិន បានព្រមានរដ្ឋបាលលោកប្រធានាធិបតីអាមេរិក Donald Trump នៅថ្ងៃអង្គារ (០៨ កក្កដា) នេះប្រឆាំងនឹងការដុតបញ្ឆេះភាពតានតឹងពាណិជ្ជកម្មឡើងវិញតាមរយៈការស្ដារពន្ធលើទំនិញរបស់ទីក្រុងប៉េកាំងនៅខែក្រោយនេះ ហើយបានគំរាមសងសឹកលើបណ្ដាប្រទេសដែលធ្វើកិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោន ដែលកាត់ប្រទេសចិន ចេញពីបណ្ដាញផ្គត់ផ្គង់។

ទីក្រុងវ៉ាស៊ីនតោន និងទីក្រុងប៉េកាំង បានយល់ព្រមលើក្របខណ្ឌពាណិជ្ជកម្មមួយកាលខែមិថុនា ដែលបានស្ដារឡើងវិញនូវកិច្ចព្រមព្រៀងផ្អាកពន្ធដ៏ផុយស្រួយ ប៉ុន្តែជាមួយនឹងព័ត៌មានលម្អិតជាច្រើននៅតែមិនច្បាស់លាស់ ពាណិជ្ជករ និងវិនិយោគិននៅភាគីទាំងពីរនៃប៉ាស៊ីហ្វិក កំពុងបារម្ភថាតើកិច្ចព្រមព្រៀងនោះនឹងរលត់បាត់ ឬអាចនាំឱ្យមានការបន្ទាបពន្ធយូរអង្វែង។

កាលថ្ងៃចន្ទ លោក Trump បានជូនដំណឹងដល់ដៃគូពាណិជ្ជកម្មពីការដំឡើងពន្ធបដិការខ្ពស់ៗរបស់អាមេរិក ចាប់ពីថ្ងៃទី០១ ខែសីហា ខាងមុខ។ ចិន ដែលដំបូងឡើយរងពន្ធលើសពី ១០០% មានពេលរហូតដល់ថ្ងៃទី១២ ខែសីហា ក្នុងការឈានដល់កិច្ចព្រមព្រៀងថ្មីជាមួយសេតវិមាន ដើម្បីរារាំងលោក Trump មិនឱ្យស្តារឡើងវិញនូវការទប់ស្កាត់ការនាំចូលបន្ថែម ដែលបានដាក់អំឡុងពេលពន្ធសងសឹកទៅមកក្នុងខែមេសា និងឧសភា។

កាសែត People's Daily បាននិយាយក្នុងបទអត្ថាធិប្បាយមួយសំដៅលើជុំនៃភាពតានតឹងពាណិជ្ជកម្មចិន-អាមេរិកថា "ការសន្និដ្ឋានមួយគឺច្បាស់ណាស់ថាការសន្ទនា និងកិច្ចសហប្រតិបត្តិការគឺជាផ្លូវត្រឹមត្រូវតែមួយគត់"។ សេចក្ដីអត្ថាធិប្បាយនេះក៏បានកំណត់ដំណាក់កាលសម្រាប់សង្គ្រាមពន្ធថ្មីមួយទៀត ប្រសិនបើលោក Trump នៅតែប្រកាន់ខ្ជាប់នូវអ្វីដែលហៅថា "ពេលកំណត់ចុងក្រោយ" របស់ខ្លួន៕