អាជ្ញាធរលីប៊ីកាលពីថ្ងៃចន្ទ បាននិយាយថា ពួកគេបានស្ទាក់ចាប់ជនអន្តោប្រវេសន៍ចំនួន ១១៣ នាក់ ចេញពីឆ្នេរសមុទ្ររបស់ប្រទេសនេះ ហើយបានរកឃើញសាកសពចំនួន ៣នាក់ ក្នុងប្រតិបត្តិការដាច់ដោយឡែក ក្នុងរយៈពេល ៣ថ្ងៃ។

ក្រសួងមហាផ្ទៃ បាននិយាយថា សាកសពនៃ«ជនអន្តោប្រវេសន៍ខុសច្បាប់ចំនួនបីនាក់ ដែលជាជនជាតិ អាហ្រ្វិក» ត្រូវបានរកឃើញ នៅលើឆ្នេរមួយក្នុងទីក្រុង Misrata មានចម្ងាយប្រហែល ២០០គីឡូម៉ែត្រ (១២៥ម៉ាយ) ភាគខាងកើតទីក្រុងទ្រីប៉ូលី។

ក្រសួងបានបន្ថែមថា កាលពីថ្ងៃចន្ទផងដែរ កងកម្លាំងសន្តិសុខជិះអូប័រមួយគ្រឿង ចាប់បានជនអន្តោ    ប្រវេសន៍ចំនួន ៥៤នាក់ ចេញពីទីក្រុង Garabulli មានចម្ងាយ ៥០ គីឡូម៉ែត្រភាគខាងកើតនៃរដ្ឋធានីទ្រី  ប៉ូលី។



ក្រសួងបានបញ្ជាក់ថា ពួកគេត្រូវបានគេនាំត្រឡប់ទៅកំពង់ផែនៃរដ្ឋធានីនេះវិញ ហើយបានប្រគល់ទៅឲ្យ អាជ្ញាធរមានសមត្ថកិច្ច។

ក្រសួងបាននិយាយកាលពីថ្ងៃអាទិត្យថា មួយថ្ងៃមុននេះ «ជាផ្នែកនៃផែនការពង្រឹងការល្បាតដែនសមុទ្រក្នុងរដូវក្តៅ» ជនអន្តោប្រវេសន៍ចំនួន ២០នាក់ ដែលមានសញ្ជាតិផ្សេងៗគ្នា ត្រូវបានជួយសង្គ្រោះចេញពីទីក្រុង Zawiya មានចម្ងាយ ៤៥ គីឡូម៉ែត្រភាគខាងលិចទីក្រុងទ្រីប៉ូលី។

ក្រសួងបានរាយការណ៍ថា កាលពីថ្ងៃសៅរ៍ ជនអន្តោប្រវេសន៍ចំនួន ៣៩នាក់ ត្រូវស្ទាក់ចាប់បាន នៅឆ្នេរសមុទ្រភាគខាងកើតនៃទីក្រុងទ្រីប៉ូលី ដោយមិនបានផ្តល់ព័ត៌មានលម្អិតបន្ថែមអំពីកន្លែងដែលពួកគេត្រូវបានរកឃើញ ឬចំណុចនៃការចាកចេញដំណើររបស់ពួកគេ។