ភ្នំពេញ៖ អ្នកជំនាញក្នុងវិស័យនាំចេញនៅកម្ពុជា មានសុទិដ្ឋិនិយមថា ការនាំចេញរបស់កម្ពុជា ជាពិសេសវិស័យ អង្ករសម្រាប់ឆ្នាំ២០២២នេះ នឹងអាចល្អប្រសើរឡើងវិញ ខណៈមួយឆ្នាំពេញ២០២១កន្លងទៅបរិមាណនាំអង្ករចេញ មានការធ្លាក់ចុះរហូតជាង ១០ភាគរយ បើធៀបនឹងឆ្នាំ២០២០។
លោក លុន យ៉េង អគ្គលេខាធិការ នៃសហព័ន្ធស្រូវអង្ករកម្ពុជា នៅព្រឹកថ្ងៃទី៤ ខែមករា ឆ្នាំ២០២២នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវីថា ការធ្លាក់ចុះនៃការនាំអង្ករចេញនេះ បណ្តាលមកពីកត្តាចំនួន៣ ដូចជា បញ្ហាថ្លៃដឹកជញ្ជូនឡើងថ្លៃរហូតដល់៦ដង កង្វះទូកុងតែន័រសម្រាប់ដាក់អង្ករនាំចេញ និងបណ្តាលមកពីការធ្លាក់ចុះតំលៃលើទីផ្សារអន្តរជាតិ។
ទោះជាយ៉ាងណាលោកជឿថា នៅឆ្នាំ២០២២នេះនឹងល្អប្រសើរឡើងវិញ ដោយសារយើងទទួលបានការជួយ ពីប្រទេសចិន ក្នុងការទិញអង្ករតាមរយះការចុះ MoU ថ្មីចំនួន ៤០ម៉ឺនតោន។
លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានមានប្រសាសន៍ថា ក្នុងបរិបទកូវីដ១៩នេះ វិស័យដឹកជញ្ជូន ទទួលរងផលប៉ះពាល់យ៉ាងខ្លាំង ក្នុងនោះថ្លៃការដឹកជញ្ជូនតាមផ្លូវទឹកនៅតាមកប៉ាល់ គឺមានការឡើងថ្លៃខ្ពស់ ដែលមិនធ្លាប់មានពីមុន និងហេតុផលមួយទៀត គឺខ្វះខាតទូកុងតឺន័រ សម្រាប់ផ្ទុកការនាំចេញ ពិសេសខាងផ្នែកអង្ករ ហើយមកដល់ពេលនេះ ចំពោះតម្លៃដឹងតាមកប៉ាលដែលទៅតំបន់ឆ្ងាយៗឆ្លងទ្វីប ដូចជានៅសហគមន៍អឺរ៉ុប និងសហរដ្ឋអាមេរិកគឺនៅមានតម្លៃខ្ពស់ដដែល។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងឆ្នាំ២០២១ បរិមាណនាំអង្ករចេញរបស់កម្ពុជាមានចំនួនសរុបជាង ៦១ម៉ឺនតោន មានការថយចុះជាង ៧៣ ០០០តោន ស្មើនឹង -១០,៦៨ភាគរយ បើធៀបនឹងបរិមាណនាំចេញក្នុងឆ្នាំ២០២០ មានចំនួនជាង ៦៩ម៉ឺនតោន៕ អត្ថបទ៖ បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
