នាយករដ្ឋមន្រ្តីអ៊ីស្រាអែលលោក Benjamin Netanyahu បានជួបប្រធានាធិបតីសហរដ្ឋអាមេរិកលោក Donald Trump នៅសេតវិមាន ដោយមេដឹកនំាទាំង ២ និយាយម្តងហើយម្តងទៀតពីសំណើជម្លោះរបស់ពួកគេ ដើម្បីផ្ទេរទាំងបង្ខំជនប៉ាឡេស្ទីនរាប់ម៉ឺននាក់ ចេញពីតំបន់ហ្កាហ្សាស្រ្ទីប ។

លោក Trump និងលោក Netanyahu បានជួបគ្នាក្នុងពិធីលាងសាយភោជន៍ពេលល្ងាចនៅបន្ទប់ខៀវរបស់សេតវិមាន កាលពីថ្ងៃចន្ទ ខណៈកិច្ចប្រជុំដោយប្រយោលនៅកាតារវាងអ៊ីស្រាអែល និងក្រុមហាម៉ាស ស្តីពីសំណើគាំទ្រដោយសហរដ្ឋអាមេរិក សម្រាប់បទឈប់បាញ់រយៈពេល ៦០ថ្ងៃ ដើម្បីផ្អាកសង្រ្គាមរយៈពេល ២២ខែនៅតំបន់ហ្កាហ្សា ហាក់ទទួលបានសន្ទុះខ្លះនោះ ។

លោក Netanyahu និយាយប្រាប់ក្រុមអ្នកសារព័ត៌មានដែលមានវត្តមាននៅជំនួបនោះថា សហរដ្ឋអាមេរិក និងអ៊ីស្រាអែល កំពុងធ្វើការជាមួយប្រទេសដទៃ ដើម្បីផ្តល់ជនប៉ាឡេស្ទីននូវអនាគតល្អប្រសើរជាងនេះ ដោយលោកលើកឡើងថា អ្នកស្រុកនៅហ្កាហ្សាអាចផ្លាស់ទៅរស់នៅប្រទេសជិតខាងបាន ។

លោក Netanyahu និយាយថា បើសិនជាពលរដ្ឋចង់នៅ ពួកគេអាចនៅបាន ប៉ុន្តែបើសិនជាពួកគេចង់ចាកចេញ ពួកគេគួរតែអាចចាកចេញទៅបាន ។ វាមិនគួរជាកន្លែងពន្ធនាគារនោះទេ វាគឺជាទីកន្លែងបើកចំហរ ហើយនិងផ្តល់ឲ្យពលរដ្ឋនូវជម្រើសសេរី ។

លោកបន្តថា ពួកយើងកំពុងធ្វើការជាមួយសហរដ្ឋអាមេរិកយ៉ាងដិតដល់ពីការស្វែងរកប្រទេស ដើម្បីចង់ដឹងថាតើពួកគេនិយាយបែបណា ថាពួកគេចង់ផ្តល់អនាគតល្អប្រសើរជាងនេះដល់ជនប៉ាឡេស្ទីនដែរឬយ៉ាងណា។ លោកគិតថា ពួកយើងជិតរកបានប្រទេសជាច្រើនហើយ ៕