តុលាការព្រហ្មទណ្ឌអន្តរជាតិ(ICC) កាលពីថ្ងៃអង្គារ ទី៨ ខែកក្កដា បានចេញដីកាចាប់ខ្លួនមេដឹកនាំជាន់ខ្ពស់២រូបរបស់ក្រុមតាលីបង់ ដោយចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ សម្រាប់ការធ្វើទុក្ខបុកម្នេញលើស្ត្រី និងក្មេងស្រី។ ចៅក្រម បាននិយាយថាមាន «ហេតុផលសមស្រប» ដើម្បីដាក់ការសង្ស័យលើមេដឹកនាំជាន់ខ្ពស់ក្រុមតាលីបង់ លោក Hibatullah Akhundzada និងលោក Abdul Hakim Haqqani ពីបទប្រព្រឹត្តការធ្វើទុក្ខបុកម្នេញផ្អែកលើយេនឌ័រ។

តុលាការ បាននិយាយនៅក្នុងសេចក្តីថ្លែងការណ៍ថា «ខណៈក្រុមតាលីបង់បានដាក់ច្បាប់ និងបម្រាមមួយចំនួនលើប្រជាជនក្នុងប្រទេសទាំងមូល ពួកគេបានដាក់គោលដៅជាពិសេសទៅលើស្ត្រីនិងក្មេងស្រី ក្នុងហេតុផលភេទរបស់ពួកគេ ដោយបានដកហូតសិទ្ធិ និងសេរីភាពជាមូលដ្ឋាន»។

ចៅក្រមតុលាការ ICC បាននិយាយថា ក្រុមតាលីបង់បាន «ដកហូតសិទ្ធ» របស់ក្មេងស្រី និងស្ត្រី នូវសិទ្ធិទទួលបានការសិក្សាអប់រំ ឯកជនភាព ជីវិតគ្រួសារ និងសេរីភាពនៃការធ្វើដំណើរ ការបញ្ចេញមតិ មនសិការ និងសាសនា។

តុលាការបាននិយាយថា ឧក្រិដ្ឋកម្មដែលត្រូវបានចោទប្រកាន់ត្រូវបានប្រព្រឹត្តនៅចន្លោះថ្ងៃទី១៥ ខែសីហា ឆ្នាំ២០២១ នៅពេលដែលក្រុមតាលីបង់បានដណ្តើមអំណាច និងបន្តរហូតដល់យ៉ាងហោចណាស់ថ្ងៃទី២០ ខែមករា ឆ្នាំ២០២៥នេះ។

អាជ្ញាធរក្រុមតាលីបង់ពុំបានឆ្លើយតបភ្លាមៗចំពោះសំណើសុំការអត្ថាធិប្បាយទេ ហើយតុលការICC ដែលមានមូលដ្ឋាននៅទីក្រុងឡាអេ ត្រូវបានបង្កើតឡើងដើម្បីគ្រប់គ្រងលើឧក្រិដ្ឋកម្មដ៏អាក្រក់បំផុតរបស់ពិភពលោក ដូចជាឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។