ព្យុះត្រូពិក ដាណាស់ (Danas) បានវាយបោកបក់នៅភាគខាងកើតប្រទេសចិន ក្នុងថ្ងៃពុធ (០៩ កក្កដា) នេះ ដោយបង្កឱ្យមានការជូនដំណឹងអំពីទឹកជំនន់យ៉ាងគំហុក និងការបិទសាលារៀន ខណៈព្យុះបានវាយលុកពាសពេញតំបន់ឧស្សាហកម្មបច្ចេកវិទ្យាជាន់ខ្ពស់របស់ប្រទេសចិន។

អាជ្ញាធរអាកាសធាតុចិន បានជំរុញឱ្យអ្នកស្រុកស្នាក់នៅក្នុងផ្ទះ ខណៈព្យុះដែលបានចុះខ្សោយពីកម្លាំងព្យុះទីហ្វុងបន្ទាប់ពីឆក់យកជីវិតមនុស្ស ២នាក់នៅកោះតៃវ៉ាន់មួយនេះ បានចាប់ផ្តើមបង្អុលទឹកភ្លៀងដែលបានស្រូបយកពីសមុទ្រចិនខាងត្បូង ហើយតម្រង់ទៅទិសនិរតី ក្នុងល្បឿនខ្យល់ប្រហែល ៥០គីឡូម៉ែត្រក្នុងមួយម៉ោង។

ព្យុះត្រូពិក ដាណាស់ កំពុងធ្វើដំណើរឆ្លងកាត់ខេត្ត Zhejiang និង Fujian ឆ្ពោះទៅខេត្ត Jiangxi និង Guangdong ហើយត្រូវព្យាករថានឹងមានទម្លាក់ទឹកភ្លៀងរហូតដល់ ៣០០មីលីម៉ែត្រ នៅផ្នែកខ្លះ។ សាលារៀនក្នុងទីក្រុង Fuzhou បានបិទនៅថ្ងៃពុធនេះ បន្ទាប់ពីអាជ្ញាធរព្រមានពីការត្រៀមទប់ទល់ទឹកជំនន់ និងព្យុះទីហ្វុង។

ទូរទស្សន៍រដ្ឋរបស់ចិន CCTV បាននិយាយថា មន្ត្រីក្នុងតំបន់នៅតាមដងទន្លេដែលមានកំពង់ផែសំខាន់ៗក្នុងទីក្រុង Fuzhou និង Xiamen កំពុងប្រឈមមុខនឹងការកើនឡើងកម្រិតទឹកដ៏គ្រោះថ្នាកក់ ខណៈអាជ្ញាធរដែនសមុទ្រក្នុងតំបន់បានផ្អាកប្រតិបត្តិការដឹកជញ្ជូនអ្នកដំណើរ៕