មនុស្សប្រហែល ២.៣០០នាក់ បានស្លាប់ដោយសារមូលហេតុទាក់ទងនឹងកម្ដៅដ៏កំណាចនៅទូទាំងទីក្រុងចំនួន១២ នៅទ្វីបអឺរ៉ុប ក្នុងអំឡុងពេលរលកកម្ដៅធ្ងន់ធ្ងរដែលបានបញ្ចប់កាលពីសប្តាហ៍មុន នេះបើយោងតាមការវិភាគយ៉ាងឆាប់រហ័សរបស់ក្រុមអ្នកវិទ្យាសាស្រ្ត ដែលបានចេញផ្សាយនៅថ្ងៃពុធ (០៩ កក្កដា) នេះ។

ការសិក្សានេះបានកំណត់គោលដៅរយៈពេល ១០ថ្ងៃ ពោលគឺចន្លោះថ្ងៃទី២៣ មិថុនា ដល់ថ្ងៃទី០២ កក្កដា ក្នុងអំឡុងពេលដែលផ្នែកធំៗនៃអឺរ៉ុបខាងលិច ត្រូវបានវាយប្រហារដោយកម្ដៅខ្លាំងក្លា ជាមួយនឹងសីតុណ្ហភាពកើនឡើងដល់ ៤០អង្សាសេ នៅអេស្ប៉ាញ និងចំហេះព្រៃបានផ្ទុះឡើងនៅបារាំង។

យោងតាមការសិក្សាស្រាវជ្រាវដែលធ្វើឡើងដោយក្រុមអ្នកវិទ្យាសាស្ត្រនៅមហាវិទ្យាល័យ Imperial College ទីក្រុងឡុងដ្រ៍ និងវិទ្យាស្ថានអនាម័យ និងឱសថត្រូពិកទីក្រុងឡុងដ្រ៍ (LSHTM) បានឱ្យដឹងថា ក្នុងចំណោមមនុស្ស ២.៣០០នាក់ ដែលត្រូវប៉ាន់ប្រមាណថាបានស្លាប់ក្នុងអំឡុងពេលនោះ មានការស្លាប់ចំនួន ១.៥០០នាក់ ត្រូវបានផ្សារភ្ជាប់ជាមួយនឹងបម្រែបម្រួលអាកាសធាតុដែលធ្វើឱ្យរលកកម្ដៅកាន់តែធ្ងន់ធ្ងរ។

ការសិក្សានេះបានគ្របដណ្តប់ទីក្រុងចំនួន១២ រួមមានបាសេឡូណា, ម៉ាឌ្រីដ, ឡុងដ្រ៍ និង មីឡាន ជាទីដែលអ្នកស្រាវជ្រាវនិយាយថា បម្រែបម្រួលអាកាសធាតុបានបង្កើនសីតុណ្ហភាពរលកកម្ដៅរហូតដល់ ៤អង្សាសេ។ សេវាអាកាសធាតុ Copernicus របស់សហភាពអឺរ៉ុប ក៏បាននិយាយនៅក្នុងព្រឹត្តិបត្រប្រចាំខែនាថ្ងៃពុធដដែលនេះថា ខែមុនគឺជាខែមិថុនា ដែលក្តៅបំផុតទីបីរបស់ភពផែនដីនៅលើកំណត់ត្រា បន្ទាប់ពីខែដូចគ្នាក្នុងឆ្នាំ២០២៤ និង២០២៣៕