នៅថ្ងៃពុធ (ទី៩ ខែកក្កដា) នេះ រុស្ស៊ីបានឲ្យដឹងថា ស្ថានទូតរបស់ខ្លួន នៅទីក្រុងតេអេរ៉ង់ បានបើកដំណើរការជាសាធារណៈឡើងវិញ ដោយកត់សម្គាល់ថា ស្ថានភាពសន្តិសុខ ក្នុងប្រទេសអ៊ីរ៉ង់ មានស្ថិរភាព បន្ទាប់មានពីជម្លោះរយៈពេល ២សប្តាហ៍ជាមួយអ៊ីស្រាអែល។

គួរបញ្ជាក់ថា បេសកកម្មនេះបានបញ្ឈប់ផ្តល់សេវាកុងស៊ុល កាលពីថ្ងៃទី១៥ ខែមិថុនា បន្ទាប់ពីអ៊ីស្រាអែលបានចាប់ផ្តើមយុទ្ធនាការទម្លាក់គ្រាប់បែកមិនធ្លាប់មានពីមុន ដោយវាយប្រហារទីតាំងនុយក្លេអ៊ែរ និងហេដ្ឋារចនាសម្ព័ន្ធយោធារបស់អ៊ីរ៉ង់ ក៏ដូចជាតំបន់លំនៅឋានផងដែរ។

ការវាយប្រហារទាំងនោះ បានសម្លាប់មនុស្សជាង ១.០០០នាក់ ក្នុងនោះមានរួមទាំងមេបញ្ជាការយោធាជាន់ខ្ពស់ និងអ្នកវិទ្យាសាស្ត្រនុយក្លេអ៊ែរផងដែរ។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់សន្និសីទសារព័ត៌មានប្រចាំថ្ងៃថា ស្ថានការណ៍មាន «ស្ថិរភាពខ្លះហើយ» ដោយបានបន្ថែមថា «សេវាកុងស៊ុលរបស់ស្ថានទូតរុស្ស៊ីប្រចាំនៅទីក្រុងតេអេរ៉ង់ កំពុងដំណើរការជាធម្មតាវិញហើយ»។

តែយ៉ាងណាក្ដី លោកស្រីក៏បានជំរុញផងដែរឲ្យប្រជាជនរុស្ស៊ីមានការប្រុងប្រយ័ត្ន និងនៅតែប្រុងប្រយ័ត្នខ្ពស់ ក្នុងពេលទៅកម្សាន្ត នៅប្រទេសនេះ៕