មន្ត្រីជាន់ខ្ពស់មួយរូបមកពីក្រសួងការបរទេសអាមេរិកបាននិយាយថា រដ្ឋមន្ត្រីការបរទេសអាមេរិក លោក Marco Rubio នឹងជួបជាមួយរដ្ឋមន្ត្រីការបរទេសរុស្ស៊ី លោក Sergei Lavrov នៅក្រៅកិច្ចប្រជុំរដ្ឋមន្ត្រីការបរទេសអាស៊ាន នៅទីក្រុងកូឡាឡាំពួរ នៅថ្ងៃព្រហស្បតិ៍ ១០ កក្កដា នេះ។

ជំនួបថ្មីនេះនឹងក្លាយជាជំនួបផ្ទាល់ជាលើកទីពីររវាងលោក Rubio និងលោក Lavrov ហើយកើតឡើងនៅពេលដែលលោកប្រធានាធិបតីអាមេរិក Donald Trump មានការខកចិត្តកាន់តែខ្លាំងឡើងជាមួយមេដឹកនាំរុស្ស៊ី លោក Vladimir Putin នៅពេលដែលសង្រ្គាមនៅអ៊ុយក្រែន បន្តអូសបន្លាយ។

ជំនួបលើកដំបូងរវាងប្រមុខការទូតទាំងពីរបានធ្វើឡើងនៅប្រទេសអារ៉ាប៊ីសាអ៊ូឌីត ក្នុងខែកុម្ភៈ ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋបាលលោក Trump ក្នុងការបង្កើតទំនាក់ទំនងទ្វេភាគីឡើងវិញ និងជួយចរចាបញ្ចប់សង្គ្រាមអ៊ុយក្រែន។

នៅក្នុងដំណើរទស្សនកិច្ចលើកដំបូងទៅកាន់អាស៊ីចាប់តាំងពីចូលកាន់តំណែងមក លោក Rubio កំពុងស្ថិតនៅក្នុងទីក្រុងកូឡាំឡាំពួរ ដើម្បីជួបជាមួយសមាជិក១០ប្រទេស នៃសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន និងជាមួយមន្ត្រីជាន់ខ្ពស់នៃរដ្ឋាភិបាលម៉ាឡេស៊ីផងដែរ៕