ក្រុមវេជ្ជបណ្ឌិត និងអ្នកជំងឺ ដែលកំពុងរងសម្ពាធកាន់តែខ្លាំងនៅមណ្ឌលវេជ្ជសាស្ត្រដ៏ធំបំផុតរបស់តំបន់ហ្កាហ្សា អាចនឹងធ្លាក់ចូលទៅក្នុងភាពងងឹតក្នុងពេលឆាប់ៗនេះ ដោយសារការផ្គត់ផ្គង់ប្រេងឥន្ធនៈធ្លាក់ចុះ ក្នុងអ្វីដែលក្រុមគ្រូពេទ្យព្រមានថា បានគំរាមកំហែងធ្វើឱ្យមន្ទីរពេទ្យ Al Shifa ដ៏ធំបំផុតនៅហ្កាហ្សាដួលរលំ និងប្រែក្លាយជាទីបញ្ចុះសព ខណៈអ៊ីស្រាអែល បន្តយុទ្ធនាការយោធាដ៏ឃោរឃៅរបស់ខ្លួន។

វេជ្ជបណ្ឌិតនៅទីនោះនិយាយថា ខណៈដែលលោកនាយករដ្ឋមន្ត្រី Benjamin Netanyahu បានពិភាក្សាពីជោគវាសនារបស់ចំណាប់ថ្នូរអ៊ីស្រាអែលនៅតំបន់ហ្កាហ្សា ជាមួយលោកប្រធានាធិបតីអាមេរិក Donald Trump ក្នុងទីក្រុងវ៉ាស៊ីនតោន អ្នកជំងឺនៅមន្ទីរពេទ្យ Al Shifa បានបន្តប្រឈមមុខនឹងគ្រោះថ្នាក់ដ៏អាក្រក់ដែលជៀសមិនផុត។

លោកវេជ្ជបណ្ឌិត Muneer Alboursh អគ្គនាយកនៃក្រសួងសុខាភិបាលហ្កាហ្សា បានប្រាប់សារព័ត៌មានរ៉យទ័រថា ការគំរាមកំហែងទាំងនេះមិនមែនកើតចេញពី "ការវាយប្រហារតាមអាកាស ឬមីស៊ីលតែម្យ៉ាងនោះទេ ប៉ុន្តែក៏ពីការឡោមព័ទ្ធយ៉ាងថប់ដង្ហើមដែលរាំងខ្ទប់ការចូលនៃប្រេងឥន្ធនៈ"។ លោកបន្តថា កង្វះខាតនេះគឺជា "ការដកហូតសិទ្ធិជាមូលដ្ឋានរបស់ជនងាយរងគ្រោះក្នុងការថែទាំសុខភាព ដោយបង្វែរមន្ទីរពេទ្យ ឱ្យក្លាយទៅជាទីបញ្ចុះសពយ៉ាងស្ងប់ស្ងាត់"។

ជនជាតិប៉ាឡេស្ទីន និងបុគ្គលិកពេទ្យបានចោទយោធាអ៊ីស្រាអែល ថាវាយប្រហារមន្ទីរពេទ្យ ប៉ុន្តែត្រូវបានបដិសេធ។ អ៊ីស្រាអែលចោទក្រុមហាម៉ាសថាប្រតិបត្តិការពីទីតាំងសុខភាពទាំងនោះ និងមានមជ្ឈមណ្ឌលបញ្ជានៅក្រោមមន្ទីរពេទ្យ ជាអ្វីដែលហាម៉ាស បដិសេធ។ ចំណែកអង្គការ WHO បាននិយាយថា មានការវាយប្រហារច្រើនជាង ៦០០លើក លើកន្លែងថែទាំសុខភាព ចាប់តាំងពីជម្លោះចាប់ផ្តើមមក ប៉ុន្តែមិនបញ្ជាក់ថាភាគីណាជាអ្នកវាយប្រហារនោះទេ៕