រដ្ឋាភិបាលសហរដ្ឋអាមេរិកបាននិយាយកាលពីថ្ងៃពុធ ទី៩ ខែកក្កដាថា ខ្លួនបានកោះហៅសាកលវិទ្យាល័យ Harvard សម្រាប់កំណត់ត្រានានាជាប់ទាក់ទងនឹងនិស្សិតដែលតាមការចោទប្រកាន់ថាជាប់ពាក់ព័ន្ធ ក្នុងការតវ៉ាជាបន្តបន្ទាប់របស់និស្សិតគាំទ្រប៉ាឡេស្ទីន ដែលរដ្ឋបាលរបស់លោកTrump បានចាត់ទុកថាជាអ្នកប្រឆាំងជ្វីហ្វនិយម។ ចាប់តាំងពីបានស្បថចូលកាន់តំណែងម្តងទៀតនៅក្នុងខែមករា លោកប្រធានាធិបតី Donald Trump បានកំណត់គោលដៅលើសាកលវិទ្យាល័យធំៗរបស់សហរដ្ឋអាមេរិក ជុំវិញការអះអាងដែលថាសាកលវិទ្យាល័យមានភាពលំអៀងផ្នែកនយោបាយទៅរកការស្អប់ខ្ពើមប្រឆាំងជ្វីហ្វនិយម។

លោក Trump បានធ្វើយុទ្ធនាការនយោបាយ និងសេដ្ឋកិច្ចប្រឆាំងសាកលវិទ្យាល័យ Harvard ដោយកាត់មូលនិធិ និងទាមទារឱ្យមានកំណត់ត្រាដ៏ទូលំទូលាយទាក់ទងនឹងនិស្សិតបរទេសដែលខ្លួនបានព្យាយាមម្តងហើយម្តងទៀតដើម្បីរារាំងសាកលវិទ្យាល័យមិនឱ្យចុះឈ្មោះចូលរៀន និងទទួលនិស្សិតបរទេស។ រដ្ឋបាលនេះបានកំណត់លក្ខណៈនៃការតវ៉ានៅទូទាំងបរិវេណសាកលវិទ្យាល័យនៅក្នុងសហរដ្ឋអាមេរិកដែលអំពាវនាវឱ្យបញ្ចប់សង្គ្រាមរបស់អ៊ីស្រាអែលនៅតំបន់ហ្កាហ្សាថាជា «ការប្រឆាំងជ្វីហ្វនិយម» និងបានចេញចំណាត់ការបណ្តេញនិស្សិតបរទេស និងសាស្ត្រាចារ្យ ដែលបានចូលរួម។ ក្រសួងសន្តិសុខមាតុភូមិ (DHS) បាននិយាយនៅក្នុងសេចក្តីថ្លែងការណ៍ថា «បន្ទាប់ពីសំណើកាលពីពេលមុនជាច្រើនដើម្បីប្រគល់ព័ត៌មានពាក់ព័ន្ធដែលទាក់ទងទៅនឹងនិស្សិតបរទេស ពេលនេះក្រសួងបញ្ជូនដីកាដោយបង្ខំឱ្យសាកលវិទ្យា Harvard អនុវត្ត»។ ឧបការីរដ្ឋមន្ត្រីក្រសួងសន្តិសុខមាតុភូមិ លោក Tricia McLaughlin បាននិយាយនៅក្នុងសេចក្តីថ្លែងការណ៍ថា «សាកលវិទ្យាល័យ Harvard ក៏ដូចជាសាកលវិទ្យាល័យដ៏ទៃទៀត បានអនុញ្ញាតឱ្យនិស្សិតបរទេសបំពានសិទ្ធិទិដ្ឋាការ និងតស៊ូមតិសម្រាប់អំពើហិង្សា និងអំពើភេរវកម្ម នៅក្នុងបរិវេណសាកលវិទ្យាល័យ។