ចក្រភពអង់គ្លេស និងអ៊ុយក្រែន កំពុងបោះជំហានទៅរកការចុះកិច្ចព្រមព្រៀងជាប្រវត្តិសាស្ត្រស្តីពីការផ្គត់ផ្គង់មីស៊ីលប្រព័ន្ធការពារដែនអាកាសពីក្រុមហ៊ុនអង់គ្លេស ថេលស៍(Thales)។ កិច្ចព្រមព្រៀងនេះនឹងត្រូវចុះហត្ថលេខាក្នុងសន្និសីទស្ដីពីការស្ដារឡើងវិញរបស់ប្រទេសអ៊ុយក្រែននៅឆ្នាំនេះ ដែលប្រព្រឹត្តទៅក្នុងទីក្រុងរ៉ូម ប្រទេសអ៊ីតាលី។      

សេចក្តីថ្លែងការណ៍បានកត់សម្គាល់ថា កិច្ចព្រមព្រៀងនេះនឹងគាំទ្រដល់កំណើនសេដ្ឋកិច្ចអង់គ្លេស និងការបង្កើតការងារថ្មី ស្របពេលដែលជួយឱ្យអ៊ុយក្រែនបន្តការប្រយុទ្ធប្រឆាំងនឹងការវាយលុករបស់រុស្ស៊ី។

កិច្ចព្រមព្រៀងនេះ នឹងផ្តល់ការផ្គត់ផ្គង់មីស៊ីលការពារដែនអាកាសជាង៥.០០០គ្រាប់ពីក្រុមហ៊ុន ថេលស៍ ដែលនឹងមិនត្រឹមតែពង្រឹងសមត្ថភាពការពារជាតិរបស់ចក្រភពអង់គ្លេសយ៉ាងសំខាន់ប៉ុណ្ណោះទេ ថែមទាំងជួយអ៊ុយក្រែនបន្តការតស៊ូរបស់ខ្លួនក្នុងសង្គ្រាមជាមួយរុស្ស៊ីផងដែរ។

ចក្រភពអង់គ្លេសក៏បានបញ្ជាក់ពីការផ្តល់ជំនួយទ្វេភាគីរហូតដល់២៨៣ លានផោនដល់អ៊ុយក្រែនក្នុងឆ្នាំខាងមុខនេះផងដែរ។

សេវាកម្មសារព័ត៌មានរបស់រដ្ឋាភិបាលបានដកស្រង់សម្តីឧបនាយករដ្ឋមន្ត្រីអង់គ្លេស លោកស្រី      អានជេលរ៉េណា (Angela Rayner) ថា សេចក្តីប្រកាសនេះបញ្ជាក់ពីការគាំទ្រនៅតែបន្តរបស់អង់គ្លេសសម្រាប់អ៊ុយក្រែន ដោយការបង្កើនការការពារដែនអាកាសរបស់ពួកគេប្រឆាំងនឹងការវាយប្រហារដោយយានដ្រូន និងមីស៊ីល និងគាំទ្រការងារសំខាន់ក្នុងការកសាងប្រទេសនេះឡើងវិញ និងផ្តល់ក្តីសង្ឃឹមដែលពួកគេត្រូវការ៕