យោងតាមមន្ត្រីស្រុកបាននិយាយកាលពីថ្ងៃព្រហស្បតិ៍ថា ចំនួនអ្នកស្លាប់នៅក្នុងឧបទ្ទវហេតុបាក់ស្ពាននៅទីក្រុង Vadodara ភាគខាងលិចប្រទេសឥណ្ឌា បានកើនឡើងដល់១៥នាក់ ខណៈប្រតិបត្តិការជួយសង្គ្រោះបានបន្តនៅថ្ងៃបន្ទាប់។

ស្ពានដែលតភ្ជាប់ស្រុក Anand និងក្រុង Vadodara នៃរដ្ឋ Gujarat ឆ្លងកាត់ទន្លេ Mahisagar បានបាក់ក្នុងអំឡុងពេលម៉ោងដ៏មមាញឹកនៅពេលព្រឹកកាលពីថ្ងៃពុធសប្តាហ៍នេះ។

អ្នកស្រុកបានមកប្រមូលផ្តុំគ្នាយ៉ាងច្រើនដើម្បីជួយដល់ក្រុមមន្ត្រីក្នុងប្រតិបត្តិការជួយសង្គ្រោះដែលបន្ត។ ការបាក់ស្ពានជារឿយៗត្រូវបានគេមើលឃើញនៅក្នុងប្រទេសឥណ្ឌា ជាពិសេសនៅកន្លែងដែលមានមនុស្សច្រើន ដែលធ្វើឲ្យកាន់តែយ៉ាប់យ៉ឺនដោយសារតែការប្រើប្រាស់សម្ភារៈគ្មានគុណភាព និងការធ្វេសប្រហែសក្នុងការថែទាំឲ្យបានទាន់ពេលវេលា។

វីដេអូពីកន្លែងកើតហេតុ បង្ហាញពីរថយន្តដឹកប្រេងមួយគ្រឿង បានស្ថិតនៅលើជម្រាលស្ពានដែលបានបាក់។ ស្ពាននេះ ត្រូវបានសាងសង់ឡើងប្រហែល៤០ឆ្នាំមកហើយ ហើយមានការព្រួយបារម្ភអំពីស្ថានភាពរបស់ស្ពាន។ សាក្សីនិយាយថា បានឮសូរសំឡេងប្រេះបែកយ៉ាងខ្លាំង ភ្លាមៗនោះរថយន្តច្រើនគ្រឿងបានធ្លាក់ចូលទៅក្នុងទឹកទន្លេ។