នាយករដ្ឋមន្ត្រីអូស្ត្រាលី លោក Anthony Albanese នឹងជួបជាមួយមេដឹកនាំចិន លោក Xi Jinping ក្នុងដំណើរទស្សនកិច្ច នាពេលខាងមុខ ដែលលោកបាននិយាយនៅថ្ងៃសុក្រ (ទី១១ ខែកក្កដា) នេះថា នឹងផ្តោតលើទំនាក់ទំនងពាណិជ្ជកម្មកាន់តែជិតស្និទ្ធ។ 

លោក Albanese នឹងចេញដំណើរនៅថ្ងៃសៅរ៍ សម្រាប់ទស្សនកិច្ច ដែលរួមមានការឈប់នៅទីក្រុងប៉េកាំង សៀងហៃ និងទីក្រុង Chengdu និងកិច្ចប្រជុំជាមួយលោក Xi លោកនាយករដ្ឋមន្ត្រី Li Qiang និងប្រធានសភាប្រជាជនចិន លោក Zhao Leji។ ព័ត៌មានលម្អិតអំពីកិច្ចប្រជុំទាំងនោះ មិនត្រូវបានបង្ហាញឲ្យដឹងនោះឡើយ។

នេះនឹងក្លាយជាដំណើរទស្សនកិច្ចលើកទី២ របស់លោក Albanese ទៅកាន់ប្រទេសចិន គិតចាប់តាំងពីរដ្ឋាភិបាលបក្សការងារ (Labor Party) បានឈ្នះឆ្នោតជាលើកដំបូងក្នុងឆ្នាំ២០២២។ ក្រុមកណ្តាល-ឆ្វេងនិយមរបស់លោក បានជាប់ឆ្នោតជាថ្មីម្ដងទៀត ជាមួយនឹងការកើនឡើងនូវសំឡេងភាគច្រើន ក្នុងខែឧសភា។ 

លោក Albanese បានទទួលជោគជ័យ ក្នុងការបញ្ចុះបញ្ចូលទីក្រុងប៉េកាំងឲ្យដកចេញរបាំងពាណិជ្ជកម្មផ្លូវការ និងក្រៅផ្លូវការជាបន្តបន្ទាប់ ដែលត្រូវបានដាក់នៅក្រោមរដ្ឋាភិបាលមុនដឹកនាំដោយក្រុមអភិរក្សនិយម ដែលធ្វើឲ្យអ្នកនាំចេញអូស្ត្រាលីខាតបង់ច្រើនជាង ២០ពាន់លានដុល្លារអូស្ត្រាលី (១៣ពាន់លានដុល្លារ) ក្នុង ១ឆ្នាំ។ ទីក្រុងប៉េកាំងបានផ្តាច់ទំនាក់ទំនងជាមួយរដ្ឋបាលមុន ជុំវិញបញ្ហាជាច្រើន៕