ព្រឹទ្ធសភាមកពីគណបក្សសាធារណរដ្ឋ លោក Lindsey Graham និងលោក Richard Blumenthal ព្រឹទ្ធសភាមកពីគណបក្សប្រជាធិបតេយ្យកំពុងជំរុញឱ្យមានចំណាត់ការឆាប់រហ័សដោយសហរដ្ឋអាមេរិក ខណៈរុស្ស៊ីបង្កើនសង្រ្គាមរបស់ខ្លួននៅអ៊ុយក្រែន រួមទាំងការអនុម័តសេចក្ដីស្នើច្បាប់ទ្វេបក្សដែលពួកគេបានដាក់ចេញសម្រាប់ការអនុវត្តទណ្ឌកម្មលើទីក្រុងមូស្គូដែលពួកគេនិយាយថាអាចជា “ញញួរ” ដែលប្រធានាធិបតី Donald Trump ត្រូវការដើម្បីបញ្ចប់ជម្លោះ។  

ច្បាប់ដែលនឹងអនុញ្ញាតឱ្យប្រធានាធិបតីដំឡើងពន្ធ៥០០% លើការនាំចូលពីប្រទេសដែលទិញសារធាតុអ៊ុយរ៉ានីញ៉ូម ឧស្ម័ន និងប្រេងរបស់រុស្ស៊ី ទទួលបានការគាំទ្រខ្លាំងក្នុងព្រឹទ្ធសភា ខណៈលោក Trump បានផ្តល់សញ្ញាថាលោកនឹងបង្កើនវិធានការរបស់សហរដ្ឋអាមេរិកប្រឆាំងនឹងរុស្ស៊ី។   

លោក Graham បាននិយាយក្នុងកម្មវិធី "Face the Nation" របស់ទូរទស្សន៍CBS កាលពីថ្ងៃអាទិត្យដោយសំដៅលើប្រធានាធិបតីរុស្ស៊ីលោក Vladimir Putin ថា លោក Blumenthal និងរូបលោក បានទទួលការគាំទ្រចំនួន៨៥រូប នៅក្នុងព្រឹទ្ធសភាសហរដ្ឋអាមេរិកសម្រាប់ការដាក់ទណ្ឌកម្មយ៉ាងធ្ងន់ធ្ងរពីសភា ក្នុងការគាំទ្រលោកប្រធានាធិបតី Trump ដើម្បីតាមដានសេដ្ឋកិច្ចរបស់រុស្ស៊ី និងប្រទេសទាំងអស់ដែលគាំទ្រម៉ាស៊ីនសង្រ្គាមលោក Putin ។  

នៅពេលសួរថាតើលោកនឹងប្រកាសទណ្ឌកម្មប្រឆាំងនឹងរុស្ស៊ីឬអត់ លោក Trump បានប្រាប់អ្នក ព័ត៌មានកាលពីថ្ងៃអាទិត្យចុងសប្តាហ៍នេះថា "យើងនឹងមើលឃើញនៅថ្ងៃស្អែក" ដោយកត់សម្គាល់ថារូបលោកនឹងជួបអគ្គលេខាធិការអង្គការណាតូលោក Mark Rutte នៅថ្ងៃចន្ទនេះ ជាមួយគ្នានោះលោកបានបញ្ជាក់ថា រូបលោកមានការខកចិត្តខ្លាំងចំពោះលោក Putin ៕