ប្រធានាធិបតីបារាំងលោក Emmanuel Macron បានគូសបញ្ជាក់ពីផែនការសម្រាប់ការកើនឡើងដ៏ធំនៃការចំណាយលើវិស័យការពារជាតិ ដោយព្រមានថាសេរីភាពរបស់អឺរ៉ុបកំពុងប្រឈមការគំរាមកំហែងខ្លាំងជាងពេលណាទាំងអស់ ចាប់តាំងពីការបញ្ចប់សង្គ្រាមលោកលើកទី ២មក ។

នៅក្នុងសុន្ទរកថាទៅកាន់កងកម្លាំងប្រដាប់អាវុធនៅទីក្រុងប៉ារីស លោកបាននិយាយថា "យើងកំពុងរស់នៅក្នុងគ្រាដ៏សំខាន់មួយ" ដោយសារតែភូមិសាស្ត្រនយោបាយដ៏ស្មុគស្មាញ។

លោក Macron បានអំពាវនាវឱ្យការចំណាយលើវិស័យការពារជាតិរបស់ប្រទេសបារាំងកើនឡើងចំនួន៣,៥ ពាន់លានអឺរ៉ូ នៅឆ្នាំក្រោយ និងបន្ទាប់មក ៣ ពាន់លានអឺរ៉ូបន្ថែមទៀតនៅឆ្នាំ២០២៧។   

ដោយយោងទៅលើការគំរាមកំហែងពីប្រទេសរុស្ស៊ី លោកបានទាត់ចោល នូវគោលនយោបាយបែបចក្រពត្តិនិយម និងជាមហាអំណាចប្លន់យកទឹកដី។

ការប្រយុទ្ធគ្នាបានផ្ទុះឡើងចាប់តាំងពីក្រុងមូស្គូបានចាប់ផ្តើមការលុកលុយពេញបន្ទុករបស់ខ្លួនលើអ៊ុយក្រែនក្នុងខែកុម្ភៈ ឆ្នាំ២០២២។

លោក Macron បានសន្យាថានឹងបង្កើនថវិកាយោធារបស់ប្រទេសបារាំងទ្វេដងនៅឆ្នាំ ២០២៧ ពោលគឺបីឆ្នាំលឿនជាងការគ្រោងទុកដំបូង។

ក្នុងឆ្នាំ ២០១៧ ថវិកាការពារជាតិរបស់ប្រទេសបារាំងមានចំនួន៣២ពាន់លានអឺរ៉ូ ហើយក្រោមផែនការនេះ នឹងកើនឡើងដល់ ៦៤ ពាន់លានអឺរ៉ូក្នុងរយៈពេលពីរឆ្នាំ។ សំណើនេះចាំបាច់ត្រូវអនុម័តដោយរដ្ឋាភិបាលបារាំង៕