​​បាល់ទាត់៖ ​ក្លិប​ហង្ស​ក្រហម Liverpool បានសំរេច​បិទ​ទីលាន​ហ្វឹកហាត់​របស់ខ្លួន​ជា​បណ្តោះអាសន្ន​ហើយ បន្ទាប់ពី​មាន​ករណី​ផ្ទុះ​ឆ្លងមេរោគ Covid-19 ខ្លាំង​នៅក្នុង​ក្លិប​។ ​ជំនួយការ​អ្នកចាត់ការ​របស់​លោក Jurgen Klopp លោក Pep Lijnders ជា​មនុស្ស​ចុងក្រោយ​ដែល​ត្រូវបាន​តេស្ត​វិជ្ជមាន Covid-19​។​

​​លោក Lijnders ទើបតែ​បាន​ដឹកនាំ Liverpool បណ្តោះអាសន្ន​កាលពី​ថ្ងៃអាទិត្យ​ស្មើ​ជាមួយ Chelsea បន្ទាប់ពី Jurgen Klopp តេស្ត​វិជ្ជមាន​។ ​ជាមួយគ្នា​នោះដែរ​កីឡាករ​សំខាន់ៗ​មួយចំនួនទៀត​ដូចជា​អ្នកចាំទី Alisson Becker, Joel Matip និង Roberto Firmino សុទ្ធតែ​អវត្តមាន​ពី​ការប្រកួត​នោះ បូក​បញ្ចូល​ជាមួយ​បុគ្គលិក​ក្លិប​ ៣នាក់​ទៀត​ដែល​សុទ្ធតែ​ឆ្លង Covid-19​។​ ​មិន​ត្រឹមតែ​ប៉ុណ្ណោះ Liverpool ក៏​នឹង​បាត់បង់​កីឡាករ ៣នាក់​សំខាន់ៗ​រួមមាន Mohamed Salah, Sadio Mane និង Naby Keita ដោយ​ពួកគេ​ត្រូវ​ទៅ​ចូលរួម​ការប្រកួត​ជើងឯក​ទ្វីបអាហ្វ្រិក​។​

​​មុននេះ​ដែរ Liverpool បានធ្វើ​លិខិតផ្លូវការ​មួយ​ស្នើ​ដើម្បី​លើក​ការប្រកួត​វគ្គ​ពាក់កណ្តាល​ផ្តាច់ព្រ័ត្រ Carabao Cup ជើង​ទី១ នៅ​ទឹកដី Arsenal ហើយក៏​ត្រូវបាន​យល់ព្រម​ពី EFL ផងដែរ​។ ​ក្រៅពី​ជួប Arsenal យប់​នេះ Liverpool ក៏ត្រូវ​ប្រកួត FA Cup នៅ​ថ្ងៃអាទិត្យ​ដែរ​ដោយ​ជួប​ជាមួយ Shrewsbury Town មុននឹង​ជួប Arsenal ម្តងទៀត​ជើង​ទី២ វគ្គ​ពាក់កណ្តាល​ផ្តាច់ព្រ័ត្រ Carabao Cup នៅ​ថ្ងៃទី១៣៕

​អត្ថបទ​៖​នាង សុភា​វុ​ធ