លោកប្រធានាធិបតី អេម៉ានុយអែល ម៉ាក្រុង(Emmanuel Macron) កាលពីថ្ងៃអាទិត្យ បានប្រកាសផែនការជំរុញការចំណាយលើវិស័យការពារជាតិរបស់ប្រទេសបារាំង ដោយសន្យាថា នឹងបង្កើនថវិកាយោធាទ្វេដង នៅឆ្នាំ ២០២៧ គឺរយៈពេលបីឆ្នាំ លឿនជាងការគ្រោងទុកដំបូង ដើម្បីឆ្លើយតបទៅនឹងពេលវេលាភូមិសាស្ត្រនយោបាយដ៏ស្មុកស្មាញមួយ។

ប្រទេសបារាំង មានគោលបំណងបង្កើនថវិកាការពារជាតិរបស់ខ្លួនទ្វេដងពីកម្រិតឆ្នាំ ២០១៧ នៅឆ្នាំ ២០៣០ ។ ទោះជាយ៉ាងណាក៏ដោយ លោក ម៉ាក្រុង បានសន្យាថា នឹងសម្រេចបានគោលដៅ នៅឆ្នាំ ២០២៧។ ថវិកាយោធាដែលមានចំនួន ៣២ពាន់លានអឺរ៉ូ ( ៣៧,៤០ពាន់លានដុល្លារ) ក្នុងឆ្នាំ ២០១៧ នឹងកើនឡើងដល់ ៦៤ពាន់លានអឺរ៉ូ នៅឆ្នាំ ២០២៧ ជាមួយនឹងទឹកប្រាក់បន្ថែមចំនួន៣,៥ពាន់លានអឺរ៉ូនៅឆ្នាំក្រោយ និង ពីរពាន់លានអឺរ៉ូទៀត សម្រាប់ឆ្នាំក្រោយ។

លោកបាននិយាយថា ការកើនឡើងនៃការចំណាយដែលកើតឡើង នៅពេលដែលប្រទេសបារាំង កំពុង   តស៊ូក្នុងការសន្សំប្រាក់ចំនួន ៤០ពាន់លានអឺរ៉ូ នៅក្នុងថវិកា ឆ្នាំ ២០២៦ របស់ខ្លួន នឹងត្រូវបានចំណាយដោយការបង្កើនសកម្មភាពសេដ្ឋកិច្ច។

លោកបាននិយាយថា៖«ឯករាជ្យភាពយោធារបស់យើង គឺមិនអាចបំបែកចេញពីឯករាជ្យភាពផ្នែកហិរញ្ញវត្ថុរបស់យើងបានទេ។ «ផែនការនេះ នឹងត្រូវបានផ្តល់ហិរញ្ញប្បទានតាមរយៈសកម្មភាពកាន់តែច្រើន និងផលិតកម្មកាន់តែច្រើន»។